काठमाडौं : शुक्रबारबाट प्रदर्शनमा आएको चलचित्र ‘के घर के डेरा’ यतिबेला देशभरका हलहरुमा लागिरहेको छ।
शुक्रबार त्यति दर्शकको साथ नपाएको चलचित्रले शनिबार भने राम्रो साथ पाएको छ। काठमाडौंका अधिकांश हलहरु लगभग भरिएका थिए।
दर्शकको संख्या बढ्दै गएपछि ‘के घर के डेरा’कि नायिकाद्वय वर्षा राउत र सुरक्षा पन्त हल भिजिटमा व्यस्त छन् । शुक्रबार केही हलमा पुगेका सुरक्षा र वर्षा शनिबार भने अलि धेरै हलहरुमा पुगे।
हलमा दर्शकलाई भेटेर चलचित्रको प्रतिक्रिया लिँदै वर्षा र सुरक्षा शनिबार दिनभरजसो व्यस्त देखिन्थे। दर्शकहरु पनि वर्षा र सुरक्षालाई भेट्न पाउँदा खुशी थिए।
एकैछिन अगाडि पर्दामा देखेका वर्षा र सुरक्षालाई आँखै अगाडि प्रत्यक्ष देख्न पाउँदा दर्शकहरु खुशी हुँदै तस्वीर समेत खिचाएका थिए।
वर्षा र सुरक्षाले पनि दर्शकसँग खुलेर कुराकानी गर्ने अनि तस्वीर लिने गरेका थिए। जे होस् दर्शकलाई भेटेर प्रतिक्रिया लिनु निकै राम्रो कुरा हो।
के घर के डेरा’मा काठमाडौंमा घर हुनेहरु र घर नभएर डेरामा बस्नेहरुको कथालाई कमेडी तरिकाले देखाइएको छ। चलचित्रलाई दिपेन्द्र के खनालले लेखन तथा निर्देशन गरेका छन् ।
चलचित्रको कथा सिंगे लामाले लेखेका हुन्। त्यसैगरी, चलचित्रमा महेश दवाडीको पटकथा तथा संवाद रहेको छ।
चलचित्रमा दयाहाङ राई, सुरक्षा पन्त, विपिन कार्की, वर्षा राउतका साथै रविन्द्र झा, लक्ष्मी गिरी, आशान्त शर्मा, प्रभाकर न्यौपाने लगायतका कलाकारको अभिनय रहेको छ।
