काठमाडौं : रिलिजपूर्व नै गीत संगीतको माध्यमबाट दर्शकको ध्यान खिच्न सफल चलचित्र हो ‘सम्हालिन्छ कहिले मन’। जब यस् चलचित्रको ‘जरुरी कुरा छ’ बोलको गीत रिलिज भयो, तब अधिकांश दर्शकको ध्यान गीतको अडियो अनि भिडियो तिर केन्द्रित भयो।

सुरेश लामा र अन्जु पन्तको आवाजको रहेको गीतको भिडियोले सबैको ध्यान खिच्यो। ध्यान पनि किन नखिचोस त, भिडियोमा समाबेश दृश्यहरु अति सुन्दर छन् । बेलायतका विभिन्न स्थानमा आकर्षक लोकेशनसहित खिचिएको ‘सम्हालिन्छ कहिले मन’को गीतको भिडियो लोभलाग्दो भएपछि पूरा चलचित्र झन कस्तो होला भन्ने कौतुहलता सबैमा छाएको थियो।

अन्ततः चलचित्र यसै शुक्रबारबाट प्रदर्शनमा आएको छ। चलचित्रमा मुख्यतया तीन कलाकारहरुको भुमिका अलि बढी छ। नायिका पूजा शर्मा, नायक आकाश श्रेष्ठ र नव नायक सोनम तोप्देनलाई बढी देख्न सकिन्छ चलचित्र अवधिभर।

त्यसो त सोनम चलचित्र क्षेत्रको लागि नयाँ अनुहार हुन् । गायनमा जमिरहेका सोनमले यसै चलचित्र मार्फत डेव्यु गरेका छन् । उनी नयाँ भएपनि चलचित्र हेर्दा चाहिँ नयाँ कलाकार जस्तो लाग्दैनन। पुराना कलाकार जस्तो अब्बल अभिनय छ उनको चलचित्रमा।

यो त भयो नव नायक सोनमले चलचित्रमा गरेको अभिनयको कुरा। अब कुरा गरौं चलचित्रका अन्य कलाकारको । नायिका पूजा शर्मा चलचित्रमा श्रेयाको भुमिकामा छिन् । उनी सरोज खनाल र गौरी मल्लको छोरी हुन् चलचित्रमा। सरोज र गौरीले बेलायतमा रेष्टुरेन्ट व्यवसाय गरेर छोरी श्रेयालाई बेलायतमै हुर्काउँछन्, उतै पढाउछन पनि।

यता, सोनम रोहनको भुमिकामा हुन्छन् । उनी सानोमा मुस्ताङको एक गुम्बामा हुर्किन्छन। फोटोग्राफीमा रुचि राख्ने रोहनलाई एकदिन एक विदेशी पर्यटकले बेलायत लिएर जान्छन् । रोहनले उतै बेलायतमै पढ्छन् , उतै बसेर फोटोग्राफीलाई अगाडि बढाउँछन। तर मुटुको समस्याबाट चाहिँ उनी ग्रसित हुन्छन् ।

त्यस्तै, चलचित्रका अर्का नायक आकाश श्रेष्ठ पनि बेलायतको एक मल्टिनेशनल कम्पनीका सिइओका छोरा सतिश हुन्छन् । कलाकार धिरेन शाक्य आकाश (सतिश)को बुवाको भुमिकामा रहेका छन् । धिरेनले पछि सतिशलाई आफ्नै कम्पनीको सिइओको जिम्मेवारी सुम्पिन्छन।

एकदिन बुवा आमासंग श्रेया (पूजा) डुंगामा रमाइरहेकी हुन्छिन् । त्यसैबेला रोहन (सोनम)ले उनीहरूको फोटो आफ्नो क्यामरामा कैद गर्छन् ।कैद गरेको देखेपछि श्रेया रिसाउँदै रोहनको क्यामरा खोस्छिन तर फोटो हेरेपछि मुस्कुराउँछिन।

यसरी रोहनसंगको पहिलो भेटबाटै श्रेया रोहनप्रती आकर्शित हुन्छिन् । बिस्तारै रोहन र श्रेया नजिक हुँदै जान्छन् । र श्रेया पनि बिस्तारै रोहनको प्रेममा पर्न थान्छिन।

त्यस्तै, चलचित्रमा सतिश (आकाश)को भेट श्रेया (पूजा) संग हुन्छन् । भेट चाहिँ श्रेयाले एकदिन आफू अफिस जानेबेला सतिशसंग लिफ्ट माग्छिन। यसरी श्रेया र सतिशको भेट हुन्छ । अनि सतिश पनि पहिलो भेटबाटै सतीस श्रेयासंग नजिक हुन्छन् । बिस्तारै सतिश पनि श्रेयाको प्रेममा पर्दैजान्छन।

यसरी चलचित्र त्रिकोणात्मक प्रेम कथामा घुमेको छ। अब बाकी कहानी, ट्वीस्ट र कलाकारहरुको अभिनयको बारेमा थाहा पाउनको लागि त हलसम्म गएर चलचित्र हेर्नैपर्छ।

झट्ट हेर्दा र सुन्दा कथा पुरानै हो। तर यस् चलचित्रमा भने पृथक तरिकाले प्रस्तुत गरेका छन् निर्देशक सुदर्शन थापाले। त्यसो त, सुदर्शन थापा भन्ने बित्तिकै लभस्टोरी चलचित्र बनाउन अब्बल निर्देशकको रुपमा चिनिन्छन। यस् चलचित्रमा पनि उनले आफ्नो अब्बलता देखाएका छन् ।

चलचित्रको अधिकांश दृश्य बेलायतका विभिन्न स्थानमा खिचिएको छ। त्यस्तो व्यस्त ठाउँमा पनि उचित तरिकाले कथालाई चलचित्रमा सुदर्शनले प्रस्तुत गरेका छन् । यो कुरामा त उनको व्यवस्थापन एवम् निर्देशकिय क्षमतालाई मान्नै पर्छ। आफ्नो निर्देशिकिय करिअरमा सुदर्शनले अर्को मास्टरपिस चलचित्र थपे भन्दा पनि अतियुक्ती नहोला।

त्यसै पनि विदेशमा चलचित्र छायांकन गर्न गाह्रो छ। तर विदेशी भुमिसंगै नेपालमा कलाकार परिचालन गरि निर्देशन गरेको यो चलचित्र शितल दिने खालको छ। यस् भन्दा अघिका चलचित्र भन्दा झन यस् चलचित्रमा सुदर्शनको काम तारिफयोग्य छ।

चलचित्र सुरु भएदेखि ब्रेक टाइमसम्म कताकता अलमलिए जस्तो महशुस हुन्छ। अझ भनौं मुख्य स्टोरीमा कतिबेला प्रदेश होला चलचित्र भन्ने भान हुन्छ । तर ब्रेक सकिन्छ, त्यसपछि भने एकपछि अर्को हुँदै ट्वीस्ट थपिँदै जान्छन् । अनि हेर्ने जोकोही दर्शकको आँखा रसाउँछन।

साधारण कथालाई अब्बल तरिकाले लेखनमा उतार्ने लेखक महेश दवाडीको लेखन पनि प्रशंसनीय नै छ । चुलबुले पूजाले चुलबुलेपन र वियोगपनको अभिनय निकै अब्बल तरिकाले निभाएकी छिन् । चलचित्रको दोस्रो भागमा त उनको अभिनय कारुणिक अनि जीवन्त लाग्छ। त्यस्तै, आकाश श्रेष्ठको अभिनय पनि अब्बल नै छ। उनको अभिनयमा परिपक्वता महशुस हुन्छ।

अभिनयकै कुरा गर्नुपर्दा सोनमले जीवन्त अभिनय गरेका छन् । सुरुदेखि अन्तिमसम्म उनको हाउभाउअ एवम् बोलीको टोनले दर्शकको ध्यान खिच्छ। चलचित्र अवधिभर हेर्ने दर्शकको ध्यान भड्किन नदिने अभिनय सोनमले गरेका छन् भन्दा फरक पर्दैन।

पहिलोपटक चलचित्रमा अभिनय गरेपनि सोनमको कामलाई प्रशंसा गर्नेको संख्या अबको दिनमा बढ्नेछ। उनका शुभचिन्तक एवम् फ्यानहरुको संख्या बढ्नेछ।

अब चलचित्रको बारेमा यतिधेरै कुरा गरेपछि छुटाउनै नहुने पक्ष हो छायांकन पक्ष। सिनेम्यानोग्राफर सौरभ लामाले यस्तो मीठो तरिकाले चलचित्र खिचेका छन् कि चलचित्र सुरुदेखि अन्तिमसम्म हेर्दा “आहा कस्तो राम्रो सिन, क्या दाम्मी लोकेशन, क्या गजब खिचाई” जस्ता शब्दहरु हलमा दर्शकको मुखबाट सुन्न पाइन्छ।

आफ्नो सतप्रतिशत मिहेनत सौरभले छायांकन पक्षमा दिएका छन् । एकदम लोभलाग्दो दृश्य छन् चलचित्रमा। कुनैपनी दृश्य अनावश्यक जस्तो महशुस हुँदैन। जे होस् सौरभ लामाको काम माथिल्लो श्रेणीको छ।

अब चलचित्रलाई झन उत्कृष्ट बनाउनको लागि ब्याकराउन्ड म्युजिकले पनि निकै ठूलो भुमिका खेलेको छ। त्यसो त, चलचित्रमा समाबेश गीतहरुले पनि झन मसला थपेका छन् । एउटा म्युजिकल लभस्टोरी बन्नमा संगीत पक्षले अतुलनीय भुमिका खेलेको छ।

अन्ततः समग्रमा चलचित्रको मेकिङ निकै उच्च छ। त्यही हो ‘ह्याप्पी इन्डिङ’ हुन्छ कि भन्ने कौतुहलता हुँदाहुँदै अन्त्य चाहिँ ‘स्याड इन्डिङ’ हुन्छ। जुन दृश्यले दर्शकको आँखा रसाउँछन। प्रेमिल तरिकाले बगेको चलचित्र अन्तिममा कारुणिक वियोगमा परिणत भैदिन्छ। अझ भनौं रोहन (सोनम) र श्रेया (पूजा) दुबैको निधन हुन्छ अन्तिममा। जुन चलचित्रको निकै ठूलो ट्वीस्ट महशुस हुन्छ।