काठमाडौं : आजबाट हलमा दुई नेपाली फिल्म ‘राधा’ र ‘प्रकाश’ प्रदर्शनमा आएको छ । लगातार फिल्म फ्लप भैरहँदा दुईवटा राम्रा फिल्म एकैसाथ प्रदर्शनमा आएको छ । त्यसमाथी बलिउडको बहुप्रतिक्षित फिल्म ‘लाइगर’ । दुई नेपाली फिल्मको भन्दा ‘लाइगर’लाई हलहरुले निकै उच्च शो दिएको छ ।

जे होस्, एकसाथ दुई नेपाली फिल्म लाग्दा दर्शक बाढिनेमा दुईमत नै छैन । अझ बलिउड फिल्मतिरै दर्शकको लर्को बढी हुनेमा त पक्का नै हो । त्यसैले आजबाट प्रदर्शनमा आएको ‘प्रकाश’ र ‘राधा’ले पनि हलमा धमाका गर्ला कि भन्ने आसा नराखे पनि हुन्छ ।

दिनेश राउतले निर्देशन गरेको फिल्म ‘प्रकाश’मा अभिनेता प्रदीप खड्का र अभिनेत्री दीया मास्केको मुख्य भुमिका रहेको छ । यो फिल्ममा प्रदीपले गरेको अभिनयको खुबै चर्चा पनि भैरहेको छ । उनले थुप्रै तारिफ पाइरहेका छन् । माओवादी द्वन्दमा आधारीत रहेर निर्माण भएको यो फिल्ममा जुम्लाको कथालाई समेटिएको छ ।

यता सुवर्ण थापाले निर्देशन गरेको फिल्म ‘राधा’मा सृष्टि श्रेष्ठ, खगेन्द्र लामिछाने, मेनुका प्रधान, निस्चल बस्नेत, सौगात मल्ल, दयाहाङ राई, बुद्धि तामाङ लगायतका कलाकारको अभिनय रहेको छ । मल्टिस्टारर फिल्मको चर्चा राम्रै छ ।

एकसाथ दुई नेपाली र एक बलिउड फिल्म प्रदर्शनमा आएकोले दर्शकलाई कुन फिल्म हेर्ने भन्ने कन्फ्युजन त पक्कै हुनेछ । अब कुन हेर्ने तपाईहरु नै रोज्नुस ।