काठमाडौं : बाबरी फिल्म्सको ब्यानरमा निर्माण भएको चलचित्र ‘बाबरी’को ट्रेलर रिलिज गरिएको छ। करिब ३ मिनेट लामो ट्रेलरमा नायक धिरज मगर, नायिका अदिती बुढाथोकी, धिरज नाडकर लगायतका कलाकारलाई देख्न सकिन्छ।

ट्रेलर हेर्दा चलचित्रको कथा प्रेममा आउने उतारचढावको पेरिफेरिमा घुमेको हुन सक्ने आँकलन लगाउन सकिन्छ। जे होस, चलचित्र प्रेमकथामा आधारित हो भन्ने छनक चाहिँ ट्रेलरले दिएको छ। जसले गर्दा लभस्टोरी चलचित्र हेर्न मन पराउने दर्शकको ध्यान खिच्न सक्छ।

सुरेन्द्र पौडेल निर्देशित चलचित्र आगामी असोज १४ गतेबाट प्रदर्शनमा आउने छ। चलचित्रको कथा सिजन दाहाल, मनोह त्रिपाठी, रित बोहरा र किशोर नेपालले संयुक्त रुपमा लेखेका हुन् । निर्देशक पौडेल स्वयंले चलचित्रको सम्पादन गरेका छन् । चलचित्रलाई नरेन्द्र मैनालीले खिचेका हुन् ।

चलचित्रमा नायक धिरज मगर र नायिका अदिती बुढाथोकीको प्रमुख भुमिका रहेको छ। धिरज र अदितीका अलवा धिरन नाडकर, बादल भक्त, कमलमणि नेपाल, उर्मिला बस्नेत, धुर्व कोइराला लगायतका कलाकारहरुको पनि चलचित्रमा अभिनय रहेको छ।

चलचित्रको डिजिटल राइट्स भने केन्द्र मोशन पिक्चर्सले लिएको छ। यस अघि रिलिज भएका चलचित्रका २ गीतलाई दर्शक स्रोताले निकै रुचाएका छन् । अब सिंगो चलचित्रलाई भने दर्शकको कत्तिको रुचाउलान त्यो त रिलिज मिति नै कुर्नुपर्ने हुन्छ।