नेपालगन्ज : शुक्रबारबाट रिलिजमा आएको चलचित्र ‘कबड्डी ४’ यतिबेला नेपालभरका हलहरुमा हाउसफुल छ। रिलिजको पहिलो दिन आक्रामक व्यापार समेत गर्न सफल चलचित्रले सुरुको दिन दर्शकको साथ अथाह पायो।
त्यसो त, शुक्रबार चलचित्र नेपालगन्जमा पनि हाउसफुल भयो। पहिला ८ शो दिइएको चलचित्र हेर्न आउने दर्शकको संख्या अत्याधिक भएपछि नेपालगन्जको क्युएफएक्स सिनेमाज बागेश्वरीमा रातिको शो थपेर ९ शो बनाइयो।
दर्शकको गजब प्रतिक्रिया पाउन सफल उक्त चलचित्र रिलिजको दोश्रो दिन शनिबार पनि नेपालगन्जमा हाउसफुल भएको छ। बिदाको दिन भएर पनि होला शनिबार नेपालगन्जमा ‘कबड्डी ४’ हेर्न आउने दर्शकको भिड अधिक थियो।
लामो समयदेखि दर्शकले कुरेर बसेको चलचित्र भएर होला देशका अधिकांश हलहरुले राम्रो शो दिएका छन् । रिलिज अगावै यस् चलचित्रले लगानी सुरक्षित गर्न सफल भएको थियो।
रिलिजको पहिलो दिन चलचित्रले बक्स अफिसमा साँढे ३ करोडको व्यापार गरेको बताइएको छ l नेपाली चलचित्र इतिहासमै यो पहिलो चलचित्र हो जसले पहिलो दिन नै यतिधेरै व्यापार गरेको l
त्रिकोणात्मक प्रेम कथामा आधारित चलचित्रमा अभिनेता दयाहाङ राइ, सौगात मल्ल र मिरुना मगर, बुद्धि तामाङ, विजय बराल, कमलमणि नेपाल, पुष्कर गुरुङ, प्रकाश घिमिरे, माओत्से गुरुङ लगायतका कलाकारको पनि चलचित्रमा अभिनय रहेको छ।
फाइनल म्याच भनिएको यस् चलचित्रको कथा रामबाबु गुरुङ र उप्रेन्द्र सुब्बाले संयुक्त रुपमा लेखेका हुन् ।
ओम चन्द रौनियार र अर्जुन कार्की कार्यकारी निर्माता रहेको चलचित्रलाई शैलेन्द्र डि कार्कीले खिचेका हुन् ।भने, मित्र डि गुरुङले सम्पादन गरेका हुन् ।
यस् भन्दा अघिका ३ वटा सिरिजलाई दर्शकले अत्याधिक रुचाएका थिए र ३ वटै सिरिज सफल पनि भएका थिए।
