काठमाडौं : आफ्ना गीतहरुमा यथार्थलाई समेट्ने सर्जक हुन् याम प्रसाद निउरे। संख्यात्मक भन्दा पनि गुणात्मक गीत सृजना गर्न रुचाउने सर्जक निउरेका बजारमा कमै गीत रिलिज भएका छन् । तर कमै गीत भएपनि सर्जक निउरेले भने दर्शक स्रोताको माया धेरै पाउने गरेका छन् ।
यसैबीच, सर्जक निउरेको नयाँ गीत यतिबेला बजारमा छ। केही हप्ता अघि रिलिज भएको “जनता सचेत बनौं” बोलको गीतमा निउरेले वास्तविक कुरा समेटेका छन् । गीतमा लोकप्रिय गायक बद्री पंगेनी, विष्णु खत्री, सागर बिरही, गायिका अस्मिता डल्लाकोटी र लक्ष्मी रिजालको सुमधुर आवाज रहेको छ।
गीतलाई सागर बिरहीले संगीत भर्ने र अरेन्जमेन्ट गर्ने काम गरेका छन् । स्थानीय तहको चुनाव नजिकिँदै गर्दा राम्रा र असल नेतालाई छानेर मात्र भोट गर्न जनतालाई सचेत हुन सुझाएका छन् गीत मार्फत सर्जक निउरेले।
गीतको अडियो पक्ष निकै सशक्त छ। सुन्ने जोकोहीलाई गीतका शब्दहरुले आकर्षित पार्छन् । “एन्जल म्युजिक” नामक युट्युब च्यानलबाट रिलिज भएको गीतलाई छोटो समयमै दर्शक स्रोताले औधी रुचाएका छन् । गीतलाई राम्रा राम्रा प्रतिक्रिया मिलिरहेका छन् । युट्युबको कमेन्ट सेक्सन हेर्दा नराम्रो कमेन्ट प्रायः भेटिँदैन।
त्यसो त, गीतलाई टिकटकतिर पनि रुचाएको छ। सामाजिक संजाल फेसबुक तिर पनि गीतको चर्चा उत्तिकै छ। दर्जनौं फेसबुक पेजहरुबाट गीतलाई मिलियन बढी भ्युज मिलेको छ र हजारौं बढी सकारात्मक प्रतिक्रिया मिलेको छ। जसबाट सर्जक निउरे निकै खुशी छन् ।
राष्ट्रियताको विषयमा बढी कलम चलाउन रुचाउने सर्जक निउरेले यस् गीतमा पनि राष्ट्रियताको कुरालाई उठान गरेका छन् । सर्जक निउरे भन्छन् , ” म सधै संख्यात्मक भन्दा पनि गुणात्मक गीत सृजना गरेर बजारमा ल्याउँ भन्ने सोच्छु। त्यसो त, मलाई प्रायः मलाई राष्ट्रिय राष्ट्रियताको विषयमा गीत सृजना गर्न मन पर्छ। त्यसैको उपज हो ‘जनता सचेत बनौं’ बोलको गीत।”
यस् भन्दा अघि निउरे सृजित “देश लुटेर खानी”, “कर्मघर”, “हाँसी हाँसी जाउ” लगायत दर्जनौं गीतलाई दर्शक स्रोताले धेरै रुचाएका छन् । नयाँ गीत “जनता सचेत बनौं”लाई पनि दर्शक स्रोताको माया बढ्दो छ।
दर्शक स्रोताकै मायाले गर्दा गीत सृजना गर्न हौसला मिल्ने बताउने सर्जक निउरेले अब छिट्टै नयाँ गीतको तयारी गरेको पनि बताएका छन् । नयाँ गीत्स केही विशेष र फरक रहने उनको भनाइ छ।
