नेपालगन्ज : नेपाली चलचित्र क्षेत्रका महानायक राजेश हमाल नेपालगन्ज आउँदैछन् । भोलि शनिबार नेपालगन्जमा हुन गईरहेको “७ औं धारा नेपालगन्ज म्याराथन”को शोभा बढाउन महानायक हमाल नेपालगन्ज आउन लागेको बताइएको छ।
खेलकुदको कार्यक्रम भएतापनि खेलाडीहरुको हौसलामा थप उर्जा मिलोस भन्ने मनसायले महानायक हमाललाई म्याराथनमा निमन्त्रणा गरिएको नेपालगन्ज म्याराथनका अध्यक्ष टिएस ठकुरीले जानकारी दिए।
ठकुरीका अनुसार महानायक हमालसंगै हमाल पत्नी मधु भट्टराईको पनि म्याराथनमा उपस्थिति रहनेछ। त्यसो त, अन्य राष्ट्रिय सेलिब्रेटीको पनि म्याराथनमा उपस्थिति रहने आयोजक टिमले जनाएको छ।
नेपालगन्ज उपमहानगरपालिका नजिक बिपी चोकदेखि सुरु भइ कोहलपुर चौराहदेखि उत्तरतर्फ पुगि सोही रुट हुँदै पुनः बिपीचोकमा पूरा हुने म्याराथनमा राष्ट्रियस्तरका धावकहरु सहभागी हुनेछन। म्याराथनमा लुम्बिनी, कर्णाली, प्रदेश नम्बर ७ का खेलाडीहरुले भाग लिने बताइएको छ।
