काठमाडौं : पछिल्लो केही वर्षयता कोरोना भाइरसका कारण नयाँ नेपाली फिल्म बन्न पाएका छैनन् । नयाँ फिल्म निर्माण नभएपछि फिल्मी गीत रिलिज हुने कुरै भएन। तर पनि पछिल्लो समय रिलिज भएका केही म्युजिक भिडियोहरु फिल्मी गीत भन्दा कम लाग्दैनन। साँच्चिकै केही म्युजिक भिडियोको गुणस्तरले फिल्मी गीतको आभाष दिलाउँछन।

त्यस्तै फिल्मी गीतको आभाष दिलाउने एउटा नयाँ गीत रिलिज भएको छ। केही दिन अघि रिलिज “यस्तो माया गरौं” बोलको गीत सुन्दा साँच्चिकै फिल्मको गीत सुनेझैँ महशुस हुन्छ। गीतमा सुमन केसी र अस्मिता अधिकारीको मेलोडियस आवाज रहेको छ। गीतको शब्द अब्बल सर्जक डाक्टर कृष्णहरि बरालले लेखेका हुन् ।भने, संगीत सुमनकै रहेको छ।

गीतको अडियो निकै मेलोडियस सुनिएको छ। डाक्टर कृष्णहरि बरालका हरेक शब्दले प्रेमिल अनुभुती गराउँछन् । त्यसो त सुमनले शब्द अनुसार उत्कृष्ट संगीत दिएका छन् । गीतमा सुमन र अस्मिताको गायिकी पनि अब्बल एवम् मेलोडियस सुनिएको छ।

गीतको अडियो जति उत्कृष्ट छ भिडियो पनि त्यतिकै आकर्षक बनेको छ। सम्भावना बोकेका मिहिनेती कलाकार सन्तोष बानियाँलाई भिडियोमा देख्न सकिन्छ। यस् अघिका सन्तोषका भिडियो भन्दा यो अलि फरक लाग्ने गर्छ। यो भिडियो हेरिरहँदा वास्तवमै सन्तोषले कुनै फिल्मको भिडियोमा अभिनय गरिरहेको झैँ आभाष हुन्छ।

सन्तोषका अलवा कलाकार पेरिसा कंडेलको पनि उत्कृष्ट अभिनय रहेको छ यस् भिडियोमा। सन्तोष र पेरिसाको प्रेमिल जोडीको गजबको केमिस्ट्री देखिएको छ। उनीहरूको अभिनयले फिल्मी गीतको प्यास मेटाउँछ। पेरिसासंगै सन्तोषले पनि निकै मिहिनेत गरेको झल्किन्छ भिडियोमा।

म्युजिक भिडियोमा पेरिसा नयाँ भएतापनि उनको अभिनय हेर्दा निकै प्रोफेशनल लाग्ने गर्छ। यस् भिडियोमा पनि पेरिसाको काम प्रशंसा योग्य छ। साँच्चिकै पेरिसा र सन्तोषलाई भिडियोमा हेर्दा कुनै नायक नायिका अभिनित फिल्मी गीत हेरेझैं लाग्ने गर्छ।

भिडियोको हरेक पक्ष उत्कृष्ट लाग्छ। भिडियोका निर्देशक उत्तम श्रेष्ठ “शिशिर” हुन् । भिडियो मेकिङ निकै रिच छ। ड्रेसअप देखि लिएर लोकेशन पनि आकर्षक राखिएको छ। आकर्षक फ्रेममा ज्ञानेन्द्र शर्मा ‘हुमागाइँ’ले भिडियो खिचेका हुन् । अमृत चापागाईंले भिडियोको सम्पादन अनि रंग संयोजन गर्ने काम गरेका छन् ।

त्यसो त, सन्तोषमा फिल्मको नायक हुने सपना छ। त्यसै अनुरुप केही सिकाइ होस् भनेर उनी राम्रा राम्रा म्युजिक भिडियोमा अभिनय गरिरहेका छन् पछिल्लो समय। कानैमा झुम्का, चानचुन पैसा , ए सुनन, आकसको जुन, तिमी , न्युरोड घुमाउँछु, आधी आधी, आँखा आँखा जुधी, माया कुरा सुनिदेउ मिठा मिठा बात लगायतका दर्जनौं म्युजिक भिडियोमा सन्तोषले उत्कृष्ट अभिनय गरिसकेका छन् ।