काठमाडौं : भुमिका गिरी नेपाली सांगीतिक क्षेत्रमा फरक पहिचान सहित चिनिएकी गायिका हुन् । विशेषगरी लाइभ दोहोरी गाउन खप्पिस भुमिका विभिन्न मेला महोत्सवका स्टेजमा दिनहुँजसो व्यस्त हुने गायिका हुन् । तर कोरोना र त्यसपछि भएको लकडाउनले वर्षौं देखि स्टेज चढ्न नपाएको पिरलो छ भुमिकालाई।

त्यसो त, एल्बमका गीतमा पनि भुमिकालाई दर्शक स्रोताले औधी रुचाएका छन् । उनले गाउने गीत बिलकुल पृथक हुने गर्छन् । संख्यात्मक रुपमा कमै भएपनि लोकप्रिय छन् भुमिकाले गाएका गीतहरू । तिउन मीठो बनायो चुकैले, हङकङको चुरोट, आँधी खोला, फिक्का चिया लगायतका गीतहरू भुमिकाका लोकप्रिय गीतहरूमा पर्छन् ।

यसैबीच, यस् वर्षको तीज पर्वलाई लक्षित गर्दै भुमिकाले एउटा नयाँ तीज विशेष गीत बजारमा रिलिज गरेकी छिन् । केही दिन अघि रिलिज “कर्मैले बिगार्छ” बोलको तीज गीतमा भुमिकाको सुमधुर आवाज सुन्न सकिन्छ। उनलाई यस् गीतमा लोकप्रिय गायक भागिरथ चलाउनेले गायनमा सात्ब दिएका छन् । गीतको शब्द संगीत भागिरथले नै तयार पारेका हुन् ।

बजारमा आइरहेका तीज गीतहरु भन्दा पृथक छ यो गीत। यथार्थ कुरालाई गीतका शब्द मार्फत प्रस्तुत गरिएको छ। गीतको अडियो उत्कृष्ट बनेको छ। गीतमा भुमिका र भागिरथको गायिकी पनि मिठास सुनिएको छ।

गीतको अडियोसंगै भिडियो पनि आकर्षक बनेको छ । भिडियोमा भुमिका स्वयंले नृत्य अनि अभिनय गरेकी छिन् । भुमिकाका अलवा कलाकार नारायणी खत्री र अविष्यक श्रेष्ठको पनि आकर्षक नृत्य भिडियोमा देख्न सकिन्छ। उनीहरू तिनैजनाको अभिनय अनि नृत्य भिडियोमा गजब लाग्ने गर्छ। सधै गीत मात्रै गाउने भुमिका यस् गीतमा अभिनय मार्फत पनि देखिँदा दर्शक रुचाएका छन् ।

प्रोफेसनल अभिनय गर्ने कलाकार झै लाग्छ भिडियोमा भुमिकाको नृत्य अनि अभिनय हेर्दा। लाग्छ, उनी गायनमा मात्रै होइन अभिनयमा पनि फिट छिन् । भिडियोलाई राजकुमार मगरले निर्देशन अनि सम्पादन गरेका हुन् । प्रकाश खड्काले आकर्षक फ्रेममा खिचेको भिडियोका कोरियोग्राफर राजारम सिंखडा हुन् । भिडियो भुमिका गिरीको अफिसियल युट्युब च्यानलबाट रिलिज गरिएको हो । हेर्नुस् भिडियो..