काठमाडौं : हरि लम्साल नेपाली सांगीतिक क्षेत्रमा उच्च नाम हो। संख्यात्मक भन्दा पनि गुणात्मक गीत संगीत सृजना गर्ने हरिका थोरै गीत बजारमा रिलिज हुन्छन् तर अब्बल हुन्छन् । त्यसो त, अब्बल संगीतकार एवं सर्जक भनेर चिनिन्छन हरि, नेपाली सांगीतिक क्षेत्रमा।

यसैबीच, हरि लम्सालद्वारा संगीत भरिएको नयाँ गीत यतिबेला बजारमा रिलिज भएको छ। केही दिन अघि रिलिज “तिम्रै लागि” बोलको गीतमा हरिको अब्बल संगीत रहेको छ। गीतमा तारा अधिकारीले उत्कृष्ट शब्द लेखेकी छिन् । तारा र हरिको उत्कृष्ट शब्द-संगीतलाई भरपुर न्याय दिई सुमधुर आवाज दिएकी छिन् लोकप्रिय गायिका इन्दिरा जोशीले। इन्दिराको आवाज गीतमा उत्कृष्ट सुनिएको छ। गीतको म्युजिक अरेन्ज उदयराज पौडेलले गरेका छन् ।

सुन्दा सफ्ट मेलोडियस लाग्ने गीतको भिडियो पनि त्यतिकै हेरिरहुँ लाग्ने बनेको छ। भिडियोमा लोकप्रिय कलाकार उषा उप्रेती र विकाश लामिछाने प्रमुख भुमिकामा फिचर्ड छन् । उषा र विकाशका अलवा धर्मेन्द्र आचार्य , रियंसी थापा, गोबिन्द काफ्ले लगायतका कलाकारहरुको पनि भिडियोमा अभिनय रहेको छ।

नव विवाहित श्रीमतीलाई घरमै छोडेर कामको लागि परदेशिएका पियारा श्रीमान् , जसको पर्खाइमा वर्षौदेखि यता घरमा कुरेर बसेकी पियारीको कथालाई भिडियोमा उत्कृष्ट शैलीमा देखाइएको छ। उषा र विकाशको अभिनय भिडियोमा जीवन्त लाग्ने गर्छ। उनीहरूको अभिनयले हेर्ने जोकोहीको ध्यान केन्द्रित पार्छ।

भिडियोलाई रमेश थापाले निर्देशन गरेका हुन् । शिव ढकालले आकर्षक फ्रेममा भिडियो खिचेका छन् भने नकुल खड्काले सम्पादन गरेका छन् । भिडियो सुनौलो नेपालको अफिसियल युट्युब च्यानलबाट रिलिज गरिएको हो। यस्तो छ भिडियो..