काठमाडौं : झिसमिसे साँझ । पार्श्वमा रेडियो गुन्जिरहेको छ। अनि त्यही रेडियोमा बजिरहेछ “लोभी आँखा” बोलको गीत। घरको आँगनको छेउमा जम्मा भएका छन् गाउँभरीका युवायुवती अनि एक अधबैंसे महिला र पुरुष। ती पुरुष हुन्छन् गाउँमा गठित एक क्लबको अध्यक्ष । क्लबको नाम हुन्छ डाँडा घरे युवा क्लब। सबैको ध्यान आफुतिर आकर्षित पार्दै अर्को हप्ता गाउँमा नाचगान गर्ने विषय बारे छलफल भइ निर्णय भएको कुरा सबैलाई सुनाउँछन् ती अध्यक्षले।

त्यस क्लबका सदस्य मध्ये हिरे र चन्द्रा नाच्ने र आफू र दिलमायाले आगामी हप्ता हुने कार्यक्रममा गीत गाउने कामको जिम्मा बाँडफाँड गर्छन् अध्यक्ष । निर्णय र जिम्मेवारी पाएपछि बैठक समाप्त गर्दै सबै घरतिर जान्छन् । अर्को हप्ता हुन्छ। अर्को हप्ताको झिसमिसे साँझमा “ओइ डाँडाघरे साँइली” भन्दै हातमा टर्च लाइट बोकेर हुरे लाग्छन् अध्यक्षको घरतिर। विस्तारै सबैजना अध्यक्षको घरमा जम्मा हुन्छन् । सबैजना उत्साहित देखिन्छन् । उज्यालोको लागि बत्ती जोडिन्छ। अघिल्लो हप्ता पाएको जिम्मेवारी सहित हिरे र चन्द्रा नाच्नलाई सुरु गर्छन् र सुरु हुन्छ यसरी गीत…

“नसा नसा रगतमा छौ तिमी,
पिरतीको अर्को नाम हौ तिमी”

यि माथीका सब कुरा कुनै चलचित्रको सिनका होइनन् । यि सबै कुरा त हालसालै बजारमा रिलिज भएको “डाँडा घरे साँइली” बोलको म्युजिक भिडियोमा समाबेश कथाको दृश्यबाट लिइएको हो। यो गीत रिलिज भएको धेरै समय छैन भएको। केही दिन अगाडि मात्रै “आफ्नो मन” नामक युट्युब च्यानलबाट रिलिज भएको हो। गीत सुन्दा निकै मेलोडियस अनि मौलिक लाग्ने गर्छ।

अडियोको कुरा गर्नुपर्दा, गीतमा आवाज दिएका छन् सुगम संगीतका लोकप्रिय गायक स्वरुपराज आचार्यले। स्वरुपले गाएको यो पहिलो लोक गीत हो। पहिलो भएपनि निकै उत्कृष्ट तरिकाले गाएका छन् उनले। सदैव आधुनिक गीतमा सुनिएको यो आवाज एक्कासी लोकगीतमा सुन्दा निकै मिठास एवं पृथक लाग्ने गर्छ। स्वरुपलाई गायनमा साथ दिएकी छिन् गायिका लक्ष्मी मल्लले । संख्यात्मक रुपमा थोरै भएपनि लक्ष्मीले गाएका सबै गीत प्रायः दर्शक स्रोता माझ लोकप्रिय छन् ।

सालैजो मिश्रीत ठाडो भाकाको संवाद गीतमा पाइन्छ। गीतका मौलिक शब्द कोरेका छन् सर्जक कृष्ण केसीले। अनि शब्द अनुसार मौलिक एवं मेलोडियस संगीत दिने काम लोकप्रिय अनि अब्बल संगीतकार श्रीकृष्ण बम मल्लले गरेका छन् । श्रीकृष्णको मौलिक संगीतमा स्वरुप र लक्ष्मीको आवाज निकै मिठास सुनिएको छ। सुन्दा गीतको शब्द, संगीत अनि गायिकी अब्बल लाग्ने गर्छ।

त्यस्तै, भिडियोको कुरा गर्नुपर्दा अडियो जति मौलिल अनि उत्कृष्ट लाग्ने गर्छ, त्यतिकै अब्बल अनि आकर्षक बनेको छ भिडियो। एकदम मौलिकपन देखाइएको छ भिडियोमा। माथी सुरुमा उल्लेख गरिएको कथाबाट सुरु भएको भिडियो अन्त्यसम्म आकर्षक तरिकाले निर्माण भएको छ।

भिडियोमा लोकप्रिय कलाकारहरुको अनुहार देख्न सकिन्छ। लोकप्रिय गायक तथा कलाकार प्रकाश सपूत, नायिका शिल्पा पोखरेल , कलाकार करिश्मा ढकाल, संगीतकार श्रीकृष्ण बम मल्ल लगायतका चर्चित अनुहार भिडियोमा देखाइएको छ। विशुद्ध गाउँले परिवेश , युवायुवती बीचको गाउँले प्रेम अनि गाउँघरमा गरिने रमाइलो रोधीको कथा वस्तुलाई भिडियोमा उत्कृष्ट शैलीमा प्रस्तुत गरिएको छ।

त्यसो त, पात्रहरुको नाम पनि गाउँघरमा राखिने नाम जस्तै राखिएको छ। प्रकाश सपूत हिरेको भुमिकामा छन् । चन्द्राको भुमिकामा करिश्मा ढकाल। अनि दिलमायाको भुमिका शिल्पाले निभाएकी छिन् भने अध्यक्षको भुमिकामा श्रीकृष्ण बम रहेका छन् । सबैलाई दिइएको भुमिका न्यायपुर्ण तरिकाले निभाएको आभाष हुन्छ भिडियो हेर्दा । प्रकाशलाई हिरेको भुमिका खुप सुहाएको छ। उनको अभिनय नेचुरल लाग्छ।

प्रकाश र करिश्मा अर्थात हिरे र चन्द्राको आकर्षक नृत्यले हेर्ने जोकोहिको ध्यान सुरुदेखि अन्त्यसम्म खिच्छ। त्यस्तै, गीत गाउने भुमिकामा देखिएका शिल्पा र श्रीकृष्ण अर्थात् अध्यक्ष र दिलमायाको भुमिकाले पनि भिडियोलाई मनमोहक बनाएको छ। दिनभरि कामकाज गर्दा लागेको थकानलाई साँझमा रोधी बसेर नाचगान गरि मेटाउने भिडियोको दृश्यले २/३ दशक पहिलेको गाउँघरको झल्को दिनेगर्छ। यस् भिडियोका पात्र हिरे र दिलमाया बीचको प्रेम अनि हिरेलाई दिलमायाले मन पराउँदा चन्द्रालाई डाह गरेको दृश्य साँच्चिकै क्या जीवन्त लाग्छ।

यसो हेर्दा भिडियोका चर्चित अनुहार मध्ये शिल्पा पोखरेलको भुमिका चाहिँ खासै महत्त्वपूर्ण नभएको आभाष हुनेगर्छ। गीत डान्सिङ प्याटर्नको भएको कारण डान्समा प्रकाश र करिश्मा काफि छन् । अनि सामान्य गीत गाउने भुमिकामा शिल्पालाई नराखेर यसै गीतकी गायिका लक्ष्मी मल्ललाई राखेको भए झनै लक्ष्मीलाई नै दर्शक माझ नोटिस हुन मद्दत पुग्थ्यो। तर शिल्पालाई राख्दा बिग्रेको चाहिँ होइन फेरि। जे होस् जम्भो टिमको समिश्रणले भिडियो गजब बनेको छ।

भिडियोमा कथा तथा निर्देशन देबेन्द्र बब्लुको रहेको छ। विशाल घिमिरे क्रियटिभ डिरेक्टरको रुपमा रहेका छन् । समग्रमा देबेन्द्र र विशालको निर्देशकिय पाटो तारिफयोग्य छ। साथै भिडियोमा मौसम हिमालीको कोरियोग्राफीको पनि तारिफ नगरी बस्न सकिन्न। मौसमले पनि प्रकाश र करिश्मालाई नचाउनको लागि निकै मिहेनत गरेको पाइन्छ भिडियो हेर्दा। आकर्षक फ्रेममा नवराज उप्रेतीले खिचेको भिडियोलाई सम्पादन गरेर चिटिक्क पार्ने काम दिन्सन शाहले गरेका छन् ।

जे होस् , गीतलाई रिलिज भएको छोटो समयमै दर्शक स्रोताले अत्याधिक रुचाएका छन् । रिलिज भएको करिब २ दिनको अवधिमा २ लाख ७५ हजार बढी भ्युज, १२ हजार बढी लाइक अनि ६ समय बढी सकारात्मक कमेन्ट गीतले युट्युबमा प्राप्त गरेको छ। गीत युट्युबको ट्रेन्डिङमा पनि परेको छ छोटो समयमै। यो समाचार तयार पार्दासम्म युट्युबको २५ औं नम्बरमा आइपुगेको छ गीत।

दर्शक स्रोताको प्रतिक्रिया बुझ्दा गीतको अडियो, भिडियो दुबै पक्षलाई मनपराएको पाइन्छ। युट्युबमा मात्रै नभएर गीतलाई टिकटकमा पनि रुचाइएको छ्। हालसम्म यस् गीतका विभिन्न अंशमा हजारौं टिकटक भिडियो बनिसकेका छन् ।यसरी दर्शक स्रोताले यस् गीतलाई दिएको साथ एवं मायालाई हेर्दा नेपाली सांगीतिक क्षेत्रमा यो गीतले नयाँ आयाम ल्याएको महशुस यदाकदा हुनेगर्छ।