ब्यूटी प्याजेन्टबाट नेपाली फिल्ममा अभिनेत्रीको रुपमा भित्रिने सुन्दरीहरुको संख्या ठूलो छ । प्रियंका कार्कीदेखि निकिता चाण्डकसम्म सुन्दरी प्रतियोगिताका उत्पादन हुन् ।
मिस नेपालको ताज जितेका श्रृष्टि श्रेष्ठ, मलिना जोशी, झरना बज्रचार्यलगायतले पनि आफूलाई अभिनेत्रीको रुपमा चिनाइसकेका छन् ।
तर, ब्यूटी प्याजेन्टबाट आएका कुनै सुन्दरीको फिल्म करिअर सुखद छैन । डेढ वर्ष अगाडि फिल्म ‘रणवीर’ बाट अर्की एक सुन्दरीले अभिनेत्रीको रुपमा डेब्यू गर्ने मौका पाएकी थिइन् । उनी हुन्, शुभेक्षा खड्का । सन् २०१२ को मिस नेपालको ‘मिस इन्टरनेशनल’ उपाधिको विजेता हुन्, उनी । यो फिल्मबाट उनीसँगै सुपुष्पा भट्टले पनि अभिनेत्रीको रुपमा डेब्यू गरेकी थिइन् ।
फिल्म रिलिज अगाडिसम्म शुभेक्षाका कारण उनको खासै चर्चा भएको थिएन । फिल्म ‘रणवीर’ बाट शुभेक्षाले आफूलाई सम्भावना बोकेको अभिनेत्रीको रुपमा उभ्याउने धेरैलाई विश्वास थियो । तर, दुर्भाग्य ! न फिल्मले बक्सअफिसमा नाफाको व्यापार गर्यो न त उनको अभिनयले नै प्रशंसा बटुल्यो । बरु, फिल्म रिलिज अगाडिसम्म उनका कारण ओझेलमा परेकी अभिनेत्री सुपुष्पा भट्टको अभिनयको वाहवाही भयो । अहिले उनको हातमा फिल्मको कमी छैन ।
‘रणवीर’ पछि सुपुष्पाले दुई फिल्ममा काम गरिसक्दा शुभेक्षाले भने नयाँ फिल्म साइन समेत गरेकी छैनन् । उनलाई कुनै फिल्मबाट अफर भएको खबर पनि बाहिरिएको छैन । फिल्म क्षेत्रमा करिअर बनाउने सपना बुनेकी उनलाई पहिलो फिल्मले नै निराश बनाउँदा कार्यक्रम उद्घोषिकाको रुपमा चित्त बुझाउनु परेको छ । कतै ‘रणवीर’ नै उनको ‘फस्ट एन्ड लास्ट’ फिल्म त हुने होइन ? धेरैलाई चासो छ ।
