काठमाडौं : त्यसो त, नेपाली सांगीतिक बजार सानो छ। सानो बजार, सिमित दर्शक स्रोता। त्यही सानो बजारमा पनि दर्शक स्रोताको गीत संगीतप्रति बृहत् माया। अनि थोरै अब्बल सर्जक तथा कलाकार । तीनै अब्बल सर्जकहरु मध्ये एक हुन् अनिश दवाडी ।

अब्बल अनि जीवन्त गीत सृजना गर्न सक्ने क्षमता भएका अनिशका पछिल्ला सृजनाहरु दर्शक स्रोताले अत्याधिक रुचाएका छन् । कामी दाइको छोरो, ए बरै लगायतका गीतहरू दर्शक स्रोताले निकै रुचाएका उनका पछिल्ला सृजनाहरु हुन् । यसैबीच, अनिशकै शब्द अनि संगीत सृजना रहेको नयाँ गीत यतिबेला बजारमा रिलिज भएको छ।

आइतबार रिलिज “सानीमाया” बोलको गीतमा अनिशको उत्कृष्ट शब्द अनि संगीत रहेको छ। लोकप्रिय गायक कुशल बेलबासे र लोकप्रिय गायिका शान्तिश्री परियारको सुमधुर आवाज गीतमा सुन्न सकिन्छ। गीतको शब्द अनि संगीत पक्ष उत्कृष्ट छ। सुन्ने जोकोहीको मन गीतले सुरुदेखि अन्त्यसम्म खिच्दछ। उसो त, कुशल र शान्तिश्रीको गायिकी गीतमा निकै मिठासयुक्त सुनिएको छ।

गीतको अडियो जति सशक्त छ, भिडियो झन अब्बल बनेको छ। दर्शक स्रोताले अत्याधिक रुचाएको जोडी कलाकार सारिका केसी र शिशिर पौडेलको जोडीको जीवन्त अभिनय भिडियोमा देख्न सकिन्छ। शिशिर र सारिकाले गरेको अभिनयले हेर्ने जोकोहीको मन जित्छ। सारिका र शिशिरका अलवा अनिश दवाडीलाई पनि भिडियोमा देख्न सकिन्छ । प्रेम सम्बन्धमा आउने फाटोको कथालाई भिडियोमा उत्कृष्ट तरिकाले देखाइएको छ।

भिडियोका निर्देशक कपिल लामा हुन् । भिडियो हेर्दा निर्माण टिमले गीतको अडियो र भिडियो दुबैमा कुनै कुराको कमि नगरेको आभाष हुन्छ। आकर्षक फ्रेम अनि लोकेशनमा सुरेश श्रेष्ठले भिडियो खिचेका हुन् । भिडियो सम्पादन एवम् कलरको पाटो चाहिँ विकाश ज्ञवालीले सम्हालेका छन् । भिडियो शिशिर पौडेलको अफिसियल युटुब च्यानलबाट रिलिज भएको हो। हेर्नुस् भिडियो…