काठमाडौं : विगत लामो समयदेखि नेपाली गीत संगीतमा सक्रिय गायक तथा सर्जक हुन् प्रेम सापकोटा सोनु। झन्डै दशक बढी समय नेपाली लोकदोहोरी क्षेत्रमा बिताइसकेका प्रेम मौलिक गीतहरू सृजना गर्न र गाउन खप्पिस छन् ।

हाल जापान छन् प्रेम। जापानको व्यस्त दैनिकि। कामको तनाव, बिश्रामको अभाव । त्यही पनि गीत संगीतलाई भने निरन्तरता दिन छोडेका छैनन् प्रेमले। त्यसो त लामो समय भइसक्यो प्रेम जापान बस्दै आएको। आफ्नो व्यस्त दैनिकीका बाबजुद पनि प्रेमले गीत सृजना गर्दै बजारमा ल्याइरहेका छन् । आफै सृजना गर्न र गाउन सक्ने अब्बल सर्जक एवं गायकको रुपमा नेपाली सांगीतिक क्षेत्रमा चिनिएका प्रेमका सयौं गीतहरू बजारमा छन् । जसमध्ये अधिकांश गीतहरु स्रोता दर्शक माझ लोकप्रिय पनि छन् ।

एउटा आफ्नो छुट्टै पहिचान बनाइसकेका प्रेम आफू मात्रै नभएर नयाँ प्रतिभालाई पनि अगाडि बढाइरहेका छन् । उनका पछिल्लो गीतहरूमा नयाँ प्रतिभालाई अवसर दिएको देख्न सकिन्छ। यसैबीच,हालै उनको एउटा नयाँ गीत बजारमा रिलिज भएको छ। केही दिन अघि रिलिज “टोपी शिरैमा” बोलको गीतमा प्रेमकै मनछुने आवाज रहेको छ। प्रेमकै शब्द अनि संगीत रहेको गीतमा गायिका तारा थापाको पनि सुमधुर आवाज सुन्न सकिन्छ।

तारा पछिल्लो समय दोहोरी च्याम्पियनबाट चर्चामा रहेकी गायिका हुन् । उनी सांगीतिक क्षेत्रमा नयाँ नै हुन् । नयाँ भएको र तारामा प्रतिभा भएकै कारण प्रेमले यस् गीतमा अवसर दिएको प्रेम बताउँछन् । ताराले यसै गीतबाट नेपाली सांगीतिक क्षेत्रमा गायिकाको रुपमा डेव्यु गरेकी छिन् । आवाज मीठो छ ताराको। यस् गीतमा पनि प्रेमसंगै ताराको गायिकी उत्कृष्ट सुनिएको छ। नयाँ प्रतिभालाई बाहिर ल्याउनुपर्छ र अग्रजले साथ दिनुपर्छ भन्ने मनसायले यस् गीतमा ताराको आवाज राखिएको प्रेमको भनाइ छ।

दुख, पिर अनि बेदना नभएको मान्छे नै हुँदैन भन्ने भाव यस् गीतबाट आभाष गर्न सकिन्छ। गीतको अडियो सुन्ने जोकोहीको मन गीतले सुरुदेखि अन्त्यसम्म केन्द्रित गर्छ। गीतको अडियो जति मनछुने छ, भिडियो पनि त्यतिकै उत्कृष्ट बनेको छ।

भिडियोमा प्रेम स्वयंलाई नै देख्न सकिन्छ। प्रेमका अलवा कविता क्षेत्री पनि भिडियोमा फिचर्ड छिन् । भिडियोलाई जापानमै खिचिएको हो। आकर्षक लोकेशन अनि फ्रेममा तेजेन्द्र भण्डारीले भिडियो खिचेका हुन् । तेजेन्द्रले नै भिडियो निर्देशन गरेका छन् । प्रेम सापकोटा सोनुको अफिसियल युट्युब च्यानलबाट रिलिज भएको गीतको भिडियोलाई सम्पादन एवं कलर गर्ने काम प्रकाश धमलाले गरेका हुन् ।

त्यसो त यस् गीतको भिडियोमा फिचर्ड भएकी कबिता पनि नयाँ नै हुन् । प्रेमले तारा र कबिता जस्ता नयाँ दुई प्रतिभालाई यस् गीतमा अवसर दिएका छन् । जुन किनै सराहनीय कार्य हो। हेर्नुस् भिडियो..