अभिनेत्री सुरविना कार्की दर्शकमाझ उतिधेरै चिनिएको अनुहार होइन । फिल्म ‘झेली’ बाट अभिनेत्रीको रुपमा डेब्यू गरेकी उनले आधा दर्जन बढी फिल्ममा अभिनय गरे पनि कुनैले उनको करिअरलाई उचाइ दिन सकेनन् ।
न त उनले आफूलाई अब्बल अभिनेत्रीको रुपमा नै प्रमाणित गर्न सकिन् । ‘हट एण्ड बोल्ड’ तस्विरका कारण मिडियामा हुने चर्चामै उनी खुसी हुनु परेको छ ।
विगत ३ वर्षदेखि उनी भारतमा बसेर बलिउड प्रवेशका लागि संघर्ष गरिरहेकी छिन् । आफ्नो फोटोसुटका तस्विर भिरेर मुम्बईका हरेक फिल्म स्टूडियो धाउँदा पनि उनको सपनाले पखेटा हाल्न पाएका छैनन् ।
हुनत, उनी जस्ता हजारौं मुम्बईकोे सडकमा अभिनेत्री बन्ने सपना बोकेर कुदिरहेका हुन्छन् । तर, उनलाई विश्वास छ कि एक दिन आफ्नो बलिउडमा जम्ने सपना पूरा हुनेछ ।
