काठमाडौं : त्यसो त, पछिल्लो समय नेपाली सांगीतिक क्षेत्रमा निर्देशक विशाल घिमिरेको नाम नौलो पक्कै होइन। थियटर आर्टिष्ट समेत रहेका विशाल विगत केही वर्ष यता म्युजिक भिडियो निर्देशनमा व्यस्त छन् ।

“ब्ल्याक लाइट पिक्चर्स” नामक आफ्नै प्रोडक्सन हाउस संचालन गर्दै राम्रा राम्रा म्युजिक भिडियो निर्देशन गर्ने विशाल संख्यात्मक भन्दा पनि गुणात्मक काममा ध्यान दिन्छन् । यसै अनुरुप उनले निर्देशन गरेका थोरै म्युजिक भिडियो बजारमा भएपनि दर्शकले एकदमै रुचाएका छन् ।

यसैबीच, विशाल निर्देशित एउटा नयाँ म्युजिक भिडियो रिलिज भएको छ। सोमबार रिलिज “हात काटेर सिउँदो भरौंला” बोलको गीतमा पछिल्लो समयका लोकप्रिय गायक बाबू कृष्ण परियार र सन्ध्या बुढाको सुमधुर आवाज रहेको छ।

गीतमा गीतकार विजय चन्द ‘दर्पण’का शब्दहरू रहेका छन् भने बाबू कृष्णकै संगीत रहेको छ। एउटा प्रेमिल प्रेम सम्बन्धमा आधारित गीत रहेको छ। गीतको अडियो निकै मेलोडियस सुनिएको छ।

त्यस्तै भिडियोको कुरा गर्नुपर्दा, गीतको भाव अनुसार नै भिडियो बनाइएको छ। भिडियोमा बाबू कृष्ण स्वयं फिचर्ड छन् । बाबुलाई मोडल अन्जना बस्नेतले अभिनयमा साथ दिएकी छिन् ।

परिवारले आफ्नो प्रेम सम्बन्ध नस्वीकार्ने अवस्था आएपछि आफ्नो प्रेमलाई सार्थकता तुल्याउन केटाकेटी दुबैले घर छोडी हिडेको कथालाई निर्देशक विशाल घिमिरेले कलात्मक शैलीमा भिडियोमा देखाएका छन् । बाबू र अन्जनाको केमिस्ट्री पनि भिडियोमा गजब देखिएको छ।

विभिन्न लोकेशन एवम् आकर्षक फ्रेममा प्रकाश खड्काले खिचेको भिडियोलाई प्रबिन भट्टले सम्पादन गरेका हुन् । भिडियो बाबू कृष्ण परियारको अफिसियल युटुब च्यानलबाट रिलिज गरिएको हो। हेर्नुस् भिडियो…