काठमाडौं : नेपाली सांगीतिक क्षेत्रमा म्युजिक भिडियो निर्देशन मार्फत आफ्नो छुट्टै पहिचान बनाएका निर्देशक हुन् विशाल घिमिरे। अब्बल निर्देशन गर्न सक्ने क्षमता भएका विशाल निर्देशित दर्जनौं म्युजिक भिडियो बजारमा छन् । जसमध्ये केही म्युजिक भिडियोलाई दर्शकले अत्याधिक रुचाएका पनि छन् ।

निर्देशन पाटो सम्हालिरहेका विशाल गायनतिर पनि होमिएका छन् । उनले नयाँ “भेटौं शनिबार” बोलको गीतबाट गायनमा डेव्यु गरेका हुन् । गीत मंगलबार बिन्दबासीनी युटुब च्यानलबाट रिलिज भएको छ।

विशालको सुमधुर आवाज गीतमा रहेको छ। विशाललाई गायनमा गायिका ममता गुरुङले साथ दिएकी छिन् । गीतको शब्द विशाल स्वयंले नै तयार पारेका हुन् भने संगीत जीवन दाहालको रहेको छ । गीत डान्सिङ अनि मेलोडियस प्याटर्नमा आधारित छ।

गीतमा ममता र विशालको गायिकी मीठो सुनिएको छ। पहिलो भएतापनि विशालको आवाज गीतमा खुलेको छ। समग्रमा गीतको अडियो उत्कृष्ट छ। गीत सुन्दा गायनमा पनि विशाल अब्बल रहेको कुरा आभाष हुनेगर्छ।

गीतको अडियो जती उत्कृष्ट छ, भिडियो पनि त्यतिनै आकर्षक बनेको छ। भिडियोमा लोकप्रिय मोडल दुर्गेश थापा र एलिना रायमाझी फिचर्ड छन् । गीतको भाव अनुसार भिडियो बनाइएको छ।

भिडियोलाई काजिश श्रेष्ठले निर्देशन गरेका हुन् । राजेश घिमिरेले आकर्षक फ्रेममा खिचेको भिडियोलाई बिनोद बमले सम्पादन गरेका छन् । हेर्नुस् भिडियो…