काठमाडौं : त्यसो त नेपाली सांगीतिक क्षेत्रमा पछिल्लो समय दैनिकजसो अवार्ड कार्यक्रमहरु भइरहने गर्छन् । कुनै कुनै त सम्पन्न भएको कुरा फेसबुकका वालहरुमा फोटोहरु आएपछि मात्रै थाहा हुने गर्छन् ।

यसरी, दैनिकजसो हुने अवार्डहरुले साँच्चिकै वास्तविक गुणस्तरीय अवार्डलाई पक्कै असर पारिरहेका छन् । लाग्छ फेसन जस्तै भइसके अवार्ड कार्यक्रम । जस्तो पायो त्यस्तै गीत नोमिनेसनमा, जस्तो पायो त्यस्तै कलाकार उत्कृष्ट । बजारमा सुनिएअनुसार जसले पैसा तिर्छ उसैले अवार्ड पाउँछ रे। साँच्चै यस्तो हुनु विकृति नै हो।

तर विगत लामो समयदेखि नेपालमा हुँदै आएको सांगीतिक अवार्ड हो विन्दवासिनी म्युजिक अवार्ड । वास्तविक कलाकारलाई अवार्ड प्रदान गर्दै प्रोत्साहन गर्दै आएको यो अवार्डको शुक्रबार मात्रै ११ औं शृङ्खला सम्पन्न भएको छ। हरेक वर्ष हुने उक्त अवार्ड कोरोनाका कारण गतवर्ष रोकिएको थियो।

विभिन्न विधामा भव्य कार्यक्रमका बीच सम्पन्न अवार्ड अन्तर्गत “अन्तर्राष्ट्रिय संगीतकर्मी सम्मान २०७७” बाट सर्जक सुरज गैह्रे ‘विवश’ सम्मानित भएका छन् । हाल दुबैमा कार्यरत रहेका सर्जक गैह्रेको यो सांगीतिक जीवनको पहिलो अवार्ड हो।

गैह्रेले चलचित्र सेल्फी किङमा समाबेश निकै लोकप्रिय गीत “जिन्दगीको के छ र भर”बाट उक्त विधामा अवार्ड चुम्न सफल भएका हुन् । यसरी आफुले लेखेको गीतबाट पहिलो अवार्ड पाउँदा एकदमै हर्षित र जिम्मेवारी बोध भएको सुरजले फिल्मीपत्रसंग कुराकानीको क्रममा बताए।

स्याङ्जाका सुरज नेपाली सांगीतिक क्षेत्रमा अब्बल सर्जकको रुपमा चिनिन्छन। मानिसको जीवन बोल्ने गीत सुरजले लेख्ने गर्छन् । उनका हरेक गीतहरुमा फरकपन पाइन्छ। उनले पहिलो गीत “धुजा धुजा पार्यौ मुटु” गीतबाट सांगीतिक फिल्डमा डेव्यु गरेका हुन् । उनले लेखेको यो गीत ५ वर्ष अघि रिलिज भएको थियो। जुन गीतलाई स्रोता दर्शकले अत्याधिक रुचाएका थिए। शिव परियारको आवाजमा रहेको उक्त गीतलाई दिपक शर्माले संगीत दिएका थिए।

पहिलो गीत नै सुपर हिट भएपछि सुरज झन अन्य गीत लेख्न उत्साहित बने। त्यसपछि उनले पछाडी फर्केर हेर्नू परेन। बिस्तारै उनको सृजनाले फिल्ममा पनि अवसर पाउन थाले। त्यसैको उपज हो लोकप्रिय गीत जिन्दगीको के छ र भर। वास्तवमै यो गीत सुन्दा जोकोही भावुक हुने गर्छ। रिष, राग, घमण्ड , धन पैसामा झगडा गर्नु, तछाड मछाड गर्नु बेकार रैछ भन्ने बोध यो गीत सुनेपछि हुनेगर्छ।

आज आएर आफुले लेखेको यो गीतले जीवनको पहिलो अवार्ड दिलाउँदा खुसीले गदगद छन् सुरज। रोजगारीको लागि दुबईमा सुरज काम गर्दै आएका छन् । काम एकातिर भएपनि उनले गीय सृजनाको कामलाई छोडेका भने छैनन् । करिब यो वर्ष मात्रै उनले लेखेका आधा दर्जन बढी गीतहरू बजारमा रिलिज भइसकेका छन् । अझै रिलिज हुने तयारीमा पनि अन्य धेरै छन् ।

सुरजले सांगेतिक जीवनको ५/६ वर्षमा करिब २ दर्जन बढी गीत लेखिसकेका छन् । जसमध्ये दर्जन बढी लोकप्रिय छन् ।