काठमाडौं : पछिल्लो केही वर्षयता नेपालमा विभिन्न किसिमका ‘रियालिटी शो’हरु भइरहेका छन् । कति फ्रेन्चाइज शो छन् भने कतिपय नेपालमै उत्पादन गरिएका शो छन् ।
यसैबीच, नेपालमै निर्माण गरिएको र कान्तिपुर टेलिभिजनबाट प्रसारण हुँदै आएको हास्य विधाको रियालीटी शो हो कमेडी च्याम्पियन । नेपालमा भइरहेका शोहरु मध्ये विल्कुलै फरक शोको रुपमा रहेको च्याम्पियनलाई धेरै दर्शकले छोटो समयमै अत्याधिक साथ दिए।
यसैअनुरुप पहिलो सिजन सफलताका साथ सम्पन्न गरेको यस् च्याम्पियनको हाल दोस्रो सिजन चलिरहेको छ। पहिलो भन्दा निकै गुणस्तरीय लाग्ने कमेडी च्याम्पियनको दोस्रो सिजनमा प्रतिस्पर्धीहरु पनि एकदमै तयारीका साथ प्रतिस्पर्धामा उत्रिएको पाइन्छ।
त्यस्तै, दोस्रो सिजनका प्रतिस्पर्धीहरु मध्ये अब्बल कमेडिका साथ लोकप्रिय भएका कमेडियन हुन् सुन्दर खनाल। तनहुँका सुन्दर पत्रकारिता, युटुबर हुँदै कमेडिमा भित्रिएका हुन् । उसो त, युटुबमा “बेबी शो” चलाएर दर्शकमाझ यसभन्दा अघि नै लोकप्रिय बनेका थिए। कमेडिमा पनि केही गर्नुपर्छ भन्ने मनसायले सुन्दरले केही महिना अघिसम्म जनता टेलिभिजनबाट प्रसारित “नेपाली कमेडी शो” मार्फत दर्शकलाई हसाइरहेका थिए।
“आफ्नो क्षमतालाई अझैं वृहत् दर्शकमाझ पुर्याउन सकिन्छ कि भनेर कमेडी च्याम्पियनमा भाग लिएको हुँ”, सुन्दर भन्छन् “कमेडी च्याम्पियनमा पनि मेरो प्रस्तुतिलाई धेरैले रुचाइ दिनुभयो एकदमै खुसी छु। जजहरुको प्रतिक्रियालाई शिरोपर गर्दै च्याम्पियनका आगामी एपिसोडमा राम्रो गर्ने कोसिस गर्नेछु। बिजेता भइएला नभईएला त्यो आफ्नो ठाउँमा छ। तर दर्शकको मनमा बस्न र धेरै कुरा सिक्न चाहिँ अवश्य पाउनेछु।”
अडिसनबाटै जज अनि दर्शकको मन जितेका सुन्दरले गत हप्ता प्रसारणमा आएको कमेडी च्याम्पियनको फिजिकल अडिसनमा दमदार कमेडी प्रस्तुती दिएका थिए। नेपाली कला क्षेत्र र कलाकारिताको विषयलाई लिएर उनले आफ्नो प्रस्तुति दिएका थिए। जुन प्रस्तुति एकदमै उच्च लेभलको थियो। जजसंगै लाखौं दर्शकले उनको उक्त प्रस्तुतिलाई मन पराएका छन् ।
हाल उनलाई “कमेडी च्याम्पियन सिजन २”को विजेताको दाबेदार प्रतिस्पर्धीको रुपमा हेर्न थालिएको छ। आगामी एपिसोडमा अझै राम्रो गर्ने चुनौती आएको सुन्दर बताउँछन् । सुन्दरले यस्तै दमदार कमेडी प्रस्तुत गर्दै जाने र दर्शकले साथ दिंदै जाने हो भने सुन्दर दोस्रो सिजनको विजेता बन्न सक्ने अनुमान धेरैले लगाएका छन् ।
सुन्दरसंगै अर्का अब्बल प्रतिस्पर्धी भरतमणी पौडेल पनि विजेताको दाबेदारीमा छन् । भरत र सुन्दर आफ्नो अब्बल प्रस्तुतिका कारण सिधै “टप १५”मा पर्न सफल पनि भएका छन् । टप १५ को प्रस्तुति आगामी शुक्रबार र शनिबार प्रसारण गरिनेछ।
