काठमाडौं : त्यसो त नेपालमा रोजगारको अभाव अझैसम्म कायमै छ। दिनहुँजसो हजारौं नेपाली युवाहरू रोजगारको सिलसिलामा विदेश पलायन भइरहेका छन् । सरकारले नेपालमै नेपालीहरूको लागि रोजगारको व्यवस्था नगर्दा हाल लाखौं नेपालीले विदेशी भुमीमा रगत पसिना बगाइरहेका छन् ।

जसरी दिनहुुँ नेपाली विदेशिन्छन, त्यसरीनै विदेशमा दैनिक दर्जनौं नेपालीले ज्यान समेत गुमाउने गरेका छन् । यो दु:खद परिस्थितिलाई सामना गर्न आज लाखौं नेपाली बाध्य छन् । हो, यस्तै कथामा आधारित एउटा नयाँ म्युजिक भिडियो रिलिज भएको छ।

शनिबार “ए सुन है साईली” बोलको म्युजिक भिडियो टंक बुढाथोकीको अफिसियल युटुब च्यानलबाट रिलिज भएको हो। गीतमा गायक हरि मोक्तानको सुमधुर आवाज रहेको छ। पछिल्लो समयका अब्बल सर्जक सुरज गैह्रे ‘विवश’ले लेखेको गीतमा सिला बहादुर मोक्तान र हरि मोक्तानले संयुक्त रुपमा संगीत भरेका छन् ।

गीतको अडियो सुन्दा जति मन भावुक हुन्छ, भिडियो हेर्दा झन आँखा रसाउने गर्छन् । भिडियोमा द मिरर युनिटका सागर हेलो जान र प्रीन्सिका श्रेष्ठ फिचर्ड छन् । उनीहरूले साँच्चिकै जीवनत अभिनय गरेका छन् ।

धन कमाउने आशले विवाह बन्धनमा बाधिँएकी आफ्नो श्रीमती अनि परिवारलाई घरमा छोडेर परदेशीएका युवा फर्किँदा बाकसमा फर्किएको नमिठो तिथो कथालाई भिडियोमा उत्कृष्ट तरिकाले देखाइएको छ। जुन हेर्दा जोकोहीको मन भावुक हुने गर्छ।

भिडियोको परिकल्पना तथा निर्देशन हरि मोक्तान र सागर हेलो जानले नै गरेका हुन् । प्रशान्त लक्ष्मणले आकर्षक फ्रेमम खिचेको भिडियोलाई सम्पादन गर्ने काम नवीन निरौलाले गरेका छन् । हेर्नुस् भिडियो…