काठमाडौं : विगत लामो समयदेखि नेपाली सांगीतिक क्षेत्रमा म्युजिक भिडियो सम्पादन गर्दै आएका कुशल सम्पादक हुन् प्रबिन भट्ट ।
करिब १ दशक बढी आफ्नो अमुल्य समय म्युजिक भिडियो सम्पादनमा बिताएका प्रबिन नेपाली सांगीतिक क्षेत्रमा डिमान्डेड सम्पादकको रुपमा पर्छन् । उनले सम्पादन गरेका हजारौं म्युजिक भिडियोहरु दर्शक माझ एकदमै लोकप्रिय समेत बनेका छन् ।
गोरखा जिल्लामा जन्मिएका प्रबिनले आज भन्दा १ दशक पहिले काठमाडौं आएपछि आफ्नो यात्रा म्युजिक फिल्डमा सुरुवात गरेका हुन् । संख्यात्मक भन्दा पनि गुणात्मक काममा ध्यान दिने प्रबिन भिडियो सम्पादन मात्रै गर्दैनन् । उनले सयौं म्युजिक भिडियो निर्देशन समेत गरिसकेका छन् ।
उनले निर्देशन गरेका अधिकांश म्युजिक भिडियोलाई दर्शकले अत्याधिक रुचाएका पनि छन् । यसैबीच, कथा बस्तुलाई उत्कृष्ट ढंगले भिडियोमा उतार्न सक्ने खुबी भएका प्रबिन निर्देशित पछिल्लो म्युजिक भिडियो हो कन्चन। एक अधुरो वास्तविक प्रेम कहानीमा आधारित उक्त म्युजिक भिडियोलाई पनि छोटो समयमै अत्याधिक रुचाइएको छ।
मेचीकाली खबरको अफिसियल युटुब च्यानलबाट रिलिज भएको छोटो समयमै युटुबको पहिलो ट्रेन्डिङमा पनि पर्न पनि सफल भएको छ। यो समाचार तयार पार्दासम्मगीतलाई एकदमै सकारात्मक प्रतिक्रिया मिलेको छ। करिव ३ दिनमै ९ लाख १४ हजार बढी भ्युज मिलेको छ।
गीतमा लोकप्रिय गायक प्रताप दास, गायिका प्रविशा अधिकारी र लक्ष्मी खड्काको सुमधुर आवाज रहेको छ। गीतमा कलाकार विजय पुनले शब्द लेखेका छन् भने ऋषि खड्काले मन छुने संगीत दिएका छन् । गीतका अरेन्जर विशाल निरौला हुन् । गीतको संगीत पक्षसंगै समावेश शब्दहरू एकदमै मर्मस्पर्शी छन् । गीत वास्तविक एउटा अधुरो प्रेम कहानीमा आधारित रहेको निर्माण टिमले जनाएको छ।
केही समय अघि आफुले प्रेम गर्ने प्रेमिकालाई नपाएपछि विष सेवन गरि आत्महत्या गरेका चितवनका कन्चन तिमिल्सिनाको अधुरो प्रेम कहानीलाई गीतमा उतारिएको बताइएको छ।
चितवनकै अनिशा कुमालको प्रेममा रहेका कन्चनले भगाएर विहे गरेपनि पछि अनिशाको परिवारले नस्वीकार्दा कन्चनले विष सेवन गरेका थिए। विष सेवन गरेका कन्चनलाई उपचारका लागि अस्पताल पुर्याइएको थियो। अस्पताल उपचारको करिब ३ महिनापछि केही हप्ता अघि कन्चनको अस्पतालमै मृत्यु भएको थियो।
हो, यही वास्तविक घटनालाई गीत र भिडियो मार्फत निर्माण टिमले प्रस्तुत गरेको छ। गीतको अडियो जति मनछुने छ, भिडियो हेर्दा झन आँखा रसाउने गर्छन् । भिडियोमा कलाकार रमा थपलिया, विजय पुन, गीता ढुंगाना, मोहन वस्नेत लगायतका कलाकारहरुको अभिनय रहेको छ।
भिडियोमा गीता र विजयको जीवन्त अभिनय रहेको छ। भिडियो हेर्दा साँच्चै वास्तविक घटना जस्तै आभाष हुनेगर्छ । साँच्चै कारुणिक अभिनय गीता र विजयले गरेका छन् । उत्कृष्ट तरिकाले कलाकारलाई भिडियोमा प्रबिनले स्क्रिन प्ले गराएका छन् । गीतको अडियोसंगै भिडियोलाई पनि लिएर चौतर्फी तारिफ मिलिरहेको छ।
अजय रेग्मीले खिचेको भिडियोलाई सागर बाबू भट्टले गरेका हुन् । भिडियोको सम्पादन पनि निर्देशक स्वयं प्रबिन भट्टले नै गरेका छन् । सह सम्पादनको काम उत्तम कुमार कार्कीले गरेका हुन् ।
गीतलाई टिकटकमा पनि अत्याधिक माया मिलेको छ। गीतका अंशमा हजारौं टिकटक भिडियो पनि बनेका छन् । यसरी आफू निर्देशीत म्युजिक भिडियोलाई दर्शकले अत्याधिक रुचाएर युट्युबको टेन्डिङ नम्बर एकमा पुर्याइदिँदा प्रबिन ज्यादै हर्षित छन् । दर्शकको यो मायाले अझै उत्कृष्ट काम गर्ने हौसला मिलेको प्रविन बताउँछन् । प्रबिनले लामो समयदेखि बिपी फिल्म्स नेपाल नामक प्रोडक्सन हाउस पनि काठमाडौंमा सन्चालन गर्दै आएका छन् ।
