काठमाडौं : पछिल्लो केही दिन यता नेपाली सांगीतिक क्षेत्रमा रिलिज पुर्व नै एउट गीतको खुब चर्चा भयो। गीतको पहिलो पोस्टर रिलिज भएलगत्तै अधिकांशले गीत उत्कृष्ट बनेको आँकलन पनि गरे। उक्त गीत थियो लोकप्रिय सर्जक तथा गायक खेम पुनको संगीत रहेको “फिक्का चिया” बोलको गीत।

उक्त गीतलाई लिएर दर्शक स्रोता मात्रै होइन सांगीतिक क्षेत्रका संगीतकर्मीहरु पनि प्रतिक्षामा रहे। उसो त रिलिज पुर्वनै चर्चा कमाउने कमै गीतहरू हुन्छन् , त्यस मध्येमा फिक्का चिया पनि पर्न सफल भयो। अधिकांशले गीतको पोस्टर सामाजिक संजालमा सेयर गर्दै बधाई पनि दिए । गीतको शीर्षक, आबद्ध कलाकारहरु साथै पोस्टरको कारण धेरैलाई कहिले आउला र हेर्न अनि सुन्न पाइएला भन्ने कौतुहलता यस् गीतले गराएको थियो।

अन्ततः बहुप्रतिक्षित गीत “फिक्का चिया” रिलिज भएको छ। सोमबार निर्माण टिमले गायिका भुमिका गिरीको अफिसियल युटुब च्यानलबाट गीत रिलिज गरेको हो। गीतमा लोकप्रिय गायक खेम सेन्चुरी र भुमिका गिरीको सुमधुर आवाज रहेको छ। गीतको शब्द समाजसेवी एवम् पत्रकार समेत रहेका राजन क्षेत्रीले सृजना गरेका हुन् ।

बजारमा आइरहेको गीतहरू मध्य बिलकुल पृथक रहेको गीतमा गायक तथा सर्जक खेम पुनले संगीत दिएका छन् । त्यसो त गीतका शब्दहरू पनि एकदम पृथक लाग्ने गर्छन् । गीतको शब्द अनुसार मेलोडियस एवम् डान्सिङ प्याटर्नको संगीत खेम पुनले भरेका छन् । खेम सेन्चुरी र भुमिका गिरीको गायिकि पनि गीतमा उत्कृष्ट सुनिएको छ।

गीतको अडियो जति दमदार सूनिन्छ , भिडियो पनि त्यतिकै दमदार अनि आकर्षक बनेको छ। गीतको अडियोदेखि भिडियो निर्माण सम्म निर्माण टिमले कुनै कुराको कमि नगरेको आभाष भिडियो हेर्दा हुनेगर्छ। भिडियो मेकिङ एकदम उच्च छ। सुन्नामा आएअनुसार करिब ७ लाख लगानी गरिएको हो रे।

भिडियोमा पछिल्लो समयका अत्याधिक व्यस्त अनि लोकप्रिय नायक पल शाह र मोडल रियाशा दाहाल फिचर्ड छन् । रियाशा र पलको आकर्षक नृत्य भिडियोमा देख्न सकिन्छ। एउटा चिया पसल गर्ने युवतीको प्रेममा डुबेका युवकको प्रेम कथालाई भिडियोमा कलात्मक शैलीमा देखाइएको छ।

भिडियोको परिकल्पना तथा निर्देशन काजिश श्रेष्ठले गरेका हुन् । आकर्षक लोकेशन अनि फ्रेममा अर्जुन तिवारीले खिचेको भिडियोलाई मिलन विश्वकर्माले सम्पादन एवम् कलर गरेका छन् । गीतको लगानीकर्ता तिलक बहादुर श्रेष्ठ हुन् । हेर्नुस् भिडियो…