काठमाडौं : लामो समय ठप्प रहेको चलचित्र क्षेत्र पछिल्लो समय नयाँ चलचित्रको छायांकन कार्य सुरु भए लगत्तै भने केही मात्रामा चकायमान हुँदै गएको छ। नयाँ चलचित्र निर्माण घोषणा संगै छायांकन कार्य धमाधम भइरहेका छन् ।

यसैबीच, नायक पुष्प खड्का र नायिका साम्राज्ञी राज्यलक्ष्मी शाह अनुबन्धित रहेको नयाँ चलचित्र “तिम्रो मेरो साथ”को छायांकन कार्य सुरु गरिएको छ। सुरुमा घोषणा गर्दा “रेड वाइन” नाम दिएको निर्माण टिमले परिस्थिति बस रेड वाइन हटाएर “तिम्रो मेरो साथ” तय गर्दै आज सोमबारबाट छायांकन कार्य सुरु गरिएको निर्माण टिमले जनाएको छ।

आर्यन फिल्म्स र बोधी एच डी को संयुक्त ब्यानरमा निर्माण हुन लागेको चलचित्रलाई रमेश एमके पौडेलले निर्देशन गर्दैछन् । उसो त रमेशले यसै चलचित्र मार्फत निर्देशनमा डेव्यु समेत गर्दैछन् । निर्माण टिमका अनुसार नेपालसंगै अमेरिकाका विभिन्न स्थानमा चलचित्रको छायांकन गरिनेछ।

चलचित्रमा सविर श्रेष्ठको कथा रहनेछ। चलचित्रको संवाद पनि सविरले नै लेखेका हुन् । पुष्प र साम्राज्ञीका अलवा सन्दीप क्षेत्री, खबपु , इमिली लामा र ध्रुव दत्तको पनि चलचित्रमा अभिनय रहने छ ।

पासाङ लामा ,निरू भण्डारी , सुमन पौडेल र सुधीर पराजुली चलचित्रका लगानीकर्ता हुन् । यस अघि चलचित्र “मारुनी”मा पुष्प र साम्राज्ञी एकसाथ जोडीको रुपमा देखिएका थिए। जुन जोडीलाई दर्शकले अत्याधिक रुचाएका पनि थिए। तर उनीहरूको जोडीलाई “तिम्रो मेरो साथ”मा कत्तिको रुचाउने हुन् त्यो त प्रदर्शन मिति कुर्नुपर्ने नै हुन्छ।