काठमाडौं : फिस्टेल मुभिजको ब्यानरमा निर्मित चलचित्र ‘एउटा यस्तो प्रेम कहानी’को शिर्ष गीत रिलिज गरिएको छ। मंगलबार ट्री इन्टरटेन्मेन्टको युटुब च्यानलबाट रिलिज शिर्ष गीतमा संगीतकार वसन्त सापकोटाको संगीत रहेको छ।

मेलोडियस प्रेमिल गीतको भिडियोमा कविता मानन्धर र शक्ति श्रेष्ठ फिचर्ड छन् । रोमान्टिक मुडमा उनीहरुलाई भिडियोमा देख्न सकिन्छ। एउटा चोखो प्रेम सम्बन्धमा रहेको जोडीको प्रगाढ माया प्रेमलाई भिडियोमा देखाइको छ। भिडियोमा कविता र शक्तिको केमिस्ट्री गजब देखिएको छ।

अभिनेत्री करिश्मा मानन्धरकि पुत्री कविता मानन्धर र अभिनेता शिव श्रेष्ठका पुत्र समेत रहेका शक्ति श्रेष्ठले यसै चलचित्र मार्फत चलचित्र नगरिमा डेव्यु गर्दैछन् । आफ्नो डेव्यु चलचित्रलाई लिएर उनीहरू उत्साहित पनि छन् ।

माघीको अवसर पारेर प्रदर्शन हुन लागेको चलचित्रमा अभिनेता शिव श्रेष्ठ र नायिका प्रियंका कार्कीको मुख्य भुमिका रहेको छ प्रेम कथा र एक्सनमा आधारित रहेको बताइएको छ। चलचित्रलाई दिपेश सापकोटाले निर्देशन गरेका हुन् ।

चलचित्रमा शिव र प्रियंकका अलवा आयुष्मान देशराज जोशी, वर्षा राउत, संजोग कोइराला, बसुन्धरा भुषाल, मिथिला शर्मा लगायतका कलाकारको अभिनय छ ।

माघ १ गते प्रदर्शन मिति तोकिएको चलचित्रका निर्माता यसोधा राई र दिनेश दर्शन धारी हुन्। यो चलचित्र यतिबेला हलवालाहरुले प्रतीक्षा गरिरहेका छन् । यो चलचित्रले हलमा एक किसिमको माहोल बनाउने पनि अपेक्षा गरिएको छ।