अर्जेन्टिनाकी पूर्व मिस वर्ल्ड नोर्मा कापेग्लीको सडक दुर्घटनामा परेर मृत्यु भएको छ । १७ डिसेम्बरमा आफ्नै घर नजिक हिँडिरहेकी उनलाई पछाडिबाट आइरहेको बसले ठक्कर दिएको थियो । ठक्कर दिएर गम्भीर घाइते बनाएको थियो । टाउको फुटेपछि उनी कोमामा पुगेकी थिइन् ।

बसको ठक्करबाट गम्भीर घाइते उनलाई अस्पतालमा उपचार भइरहेको थियो । उनको बसले ठक्कर दिएको ६ दिनपछि मृत्यु भएको समाचार एजेन्सीहरूले जनाएका छन् ।

६ दिनसम्म संघर्ष गरेपछि उनको ज्यान गयो । उनी ८१ वर्षकी थिइन् । नोर्माले सन् १९६० मा लन्डनमा आयोजित मिस वर्ल्ड उपाधि जितेकी थिइन् । उपाधि जित्ने उनी पहिलो अर्जेन्टिनी थिइन् । सो समय उनी जम्मा २१ वर्षकी रहेको बताइएको छ ।

उपाधि जितेपछि उनले ५०० पाउन्ड र एक विलासी कार पाएकी थिइन् । तर केही समयअघि दिएको अन्तर्वार्तामा उनले पैसा त पाएको तर कार नपाएको बताएकी थिइन् ।

मोडलिङमा सफल भएपछि नोर्माले गायनमा पनि प्रयास गरेकी थिइन् । सन् १९६२ मा उनले इटलीका भायोलिनवादक अर्मान्डोसँग मिलेर सेक्सी वर्ल्ड नामक गीत गाएकी थिइन् ।

दुर्घटना गराउने २८ वर्षीय बसचालकलाई पक्राउ गरिएको छ । बस पनि जफत गरिएको छ ।