काठमाडौं : स्वर्गीय छेतेन गुरुङ र सन्तोष सेन निर्देशित चलचित्र ‘प्रेम गीत ३’ आगामी चैत्रमा रिलिज हुने भएको छ। गत वर्ष नै रिलिज हुने तयारीमा रहेको चलचित्र लकडाउनका कारण रिलिज हुन सकेको थिएन।

अन्ततः यही पौष १० गतेबाट चलचित्र हल सन्चालनमा आउने घोषणा भएपछि आगामी चैत्रलाई रिलिज मिति तय गरेको निर्माण टिमले जनाएको छ। माहोल सहज भए र हलहरु खुलेर दर्शकको संख्या बढ्दै गएमा वर्षकै बहुप्रतिक्षित चलचित्रको रुपमा हेरिएको ‘प्रेम गीत ३’लाई चैत्रको अन्तिम साता रिलिज गर्ने तयारी रहेको निर्माता तथा निर्देशक सन्तोष सेनले बताए।

आसुशेन फिल्मस् प्रोडक्सनको व्यानरमा निर्मित चलचित्रको बाँकी कामहरू यतिबेला भइरहेको पनि निर्माण टिमले जनाएको छ। चलचित्रमा प्रदीप खड्काका अलवा क्रिस्टिना गुरुङ, मनिष राउत, शिव श्रेष्ठ, सुनिल थापा, सन्तोष सेन, माओत्से गुरुङ, पुस्कर कार्की, प्रेम पुरी, लक्ष्मी वर्देवा, अनुभव रेग्मी, योगिशा खत्री, सम्वृद्धि शाही ठकुरी, क्रिजन गौतम, जीवन बराल, जीवन भट्टराई, सुजल बस्नेत लगायतका कलाकारको अभिनय रहेको छ।

चलचित्रमा कल्याण सिंह र एलिश कार्कीको संगीत, हिमाल केसीको द्वन्द्व, कविराज गहतराजको नृत्य रहेको छ । बनिश शाह र भूपेन्द्र अधिकारीले चलचित्रलाई सम्पादन गरेका हुन् ।