काठमाडौं : पछिल्लो समय नेपाली सांगीतिक क्षेत्रमा उच्च बजेटका म्युजिक भिडियोहरु बन्ने क्रम बढ्दो छ। उच्च बजेटमा बनेका कतिपय म्युजिक भिडियोले लगानी सुरक्षीत गरेका छन् त कतिले गर्न सकेका छैनन् । अडियो कमजोरका कारण पनि मंहगो भिडियो भनेर बजारमा पठाइएका गीतहरुले सफलता पाउन नसकेको उदाहरण सबैमाझ छ।

तर संख्यात्मक भन्दा पनि गुणात्मक सृजनामा ध्यान दिने सर्जक मध्ये एक हुन् शिव हमाल। हरेक गीतमा फरक सृजना गर्न रुचाउने सर्जक हमालको सृजनामा एउटा नयाँ गीत रिलिज भएको छ। सोमबार रिलिज “भिरमा सेती गाई” बोलको गीतमा हमालको उत्कृष्ट शब्द अनि संगीत रहेको छ।

गीतमा बहुचर्चित गायिका विष्णु माझी र गायक बिरु लामाको सुमधुर आवाज रहेको छ। बजारमा आइरहेका गीतहरु भन्दा एकदमै पृथक मानिने गीतमा मौलिकपनको आभाष गर्न सकिन्छ। गीतको अडियो निकै उत्कृष्ट छ। सुन्ने जोकोहीले गीत मार्फत आनन्द लिन सक्छन् । मेलोडियस अनि डान्सिङ शैलीमा आधारित उक्त गीतलाई लिएर सांगीतिक क्षेत्रका व्यक्तित्वहरुसंगै धेरै स्रोता दर्शकहरु प्रतिक्षित थिए।

गीतको अडियोसंगै भिडियो पनि आकर्षक अनि सशक्त बनेको छ। भिडियो हेर्दा उच्च बजेटमा निर्माण भएको अनुमान लगाउन सकिन्छ। उसो त महंगो बजेट बनेको म्युजिक भिडियो भनेर गीत रिलिज पुर्व नै बजारमा हल्ला चलेको थियो। भिडियोमा आकर्षक आकर्षक लोकेशनहरु समाबेश गरिएको छ। तीन दिन भन्दा बढी समय लगाएर निर्माण गरिएको म्युजिक भिडियोको लोकेसन पनि ३ ओटा भन्दा बढी रहेको निर्माण टिमले जनाएको छ।

बिपि फिल्म्स नेपालको पोस्ट प्रोडक्सनमा निर्माण भएको भिडियोमा पछिल्लो समयकी लोकप्रिय डान्सर तथा मोडल रुबिना अधिकारी र लोकप्रिय कलाकार सागर लम्साल ‘बले’को दमदार डान्स देख्न सकिन्छ। सागर र रुबिनाको केमिस्ट्री भिडियोमा गजब देखिएको छ। आफ्नो मोडलिङ करिअरमा आजसम्मकै बढी आशा र मिहेनत गरेको म्युजिक भिडियो यो रहेको डान्सर रुबिना अधिकारी बताउँछिन् ।

उसो त भिडियो हेर्दा पनि अन्य भिडियो भन्दा यस् भिडियोमा रुबिनाको मिहेनत बढी रहेको अनुमान् लगाउन सकिन्छ। उता सागर पनि यसै भन्छन् । उनले पनि यस् म्युजिक भिडियोमा आफुले निकै मिहेनत गरेको बताउँछन् । भिडियोलाई अहिलेका व्यस्त निर्देशक मौसम हिमालीले निर्देशन अनि कोरियोग्राफी गरेका छन् । अजय रेग्मीले आकर्षक फ्रेममा खिचेको भिडियोलाई प्रबिन भट्टले सम्पादन गरेका हुन् ।

गीतका लगानीकर्ता गायक बिरु लामा नै हुन् । लामो समयपछि गायकमा कमब्याक गरेका बिरु यो गीतबाट एकदमै आशा रहेको बताउँछन। गीतको म्युजिक भिडियो सर्जक शिव हमालको अफिसियल युटुब च्यानलबाट रिलिज गरिएको हो। हेर्नुस् भिडियो…