नेपालगन्ज : सानैदेखि सडक नाटक, रेडियो नाटक हुँदै अहिले म्युजिक भिडियोमा गजब तरिकाले छाइरहेका सन्चारकर्मी तथा कलाकार हुन् चिरञ्जीवी सापकोटा ।

जिबी चिरनको नामले पनि परिचीत सापकोटा अभिनित म्युजिक भिडियोहरुलाई पछिल्लो समयमा दर्शक स्रोताले एकदमै रुचाएका छन् । यसैबीच, उनी अभिनित म्युजिक भिडियो “चिरा पर्या छ”लाई युटुबमा सकारात्मक प्रतिक्रिया सहित राम्रो भ्युज मिलेको छ। यो रिपोर्ट तयार पार्दासम्म यस भिडियोलाई युटुबमा ५० लाख बढी भ्युज, ५० हजार बढी लाइक अनि २ हजार बढी कमेन्ट मिलेको छ।

केही महिना अघि मात्रै रिलिज भएको उक्त गीतमा गायक बादल थापाको शब्द,संगीत अनि सुमधुर स्वर रहेको छ। मेलोडियस अनि ट्र्याजिडी प्याटर्नमा बनेको गीतको अडियो भिडियोले बजारमा राम्रै तहल्का पिट्यो। यसै म्युजिक भिडियोबाट सोलो अभिनय यात्रा सुरु गरेका चिरञ्जीवीले दर्शकको गतिलो साथ पाए।

भिडियोमा उनको अभिनयलाई लिएर राम्रो तारिफ मिल्यो। उनलाई कलाकार रोश्नी कार्कीले अभिनयमा साथ दिएकी थिईन। साथै प्रेम पुरीको पनि अभिनय रहेको थियो। भिडियोलाई सृजन बरालले निर्देशन गरेका हुन् । ज्ञानेन्द्र शर्मा हुमागाईले आकर्षक फ्रेममा खिचेको भिडियोलाई दिन्सन शाहले सम्पादन गरेका हुन् । भिडियो आहा टिभीको अफिसियल युटुब च्यानलबाट रिलिज गरिएको थियो।

भिडियोले युटुबमा ५० लाख भ्युज पाएसंगै निर्माण टिम फिमेल भर्जनको तयारीमा जुटेको कलाकार चिरञ्जीवी सापकोटाले जानकारी दिए।