नेपालगन्ज : विगत लामो समयदेखि कलाकारिता क्षेत्रसंगै संचार क्षेत्रमा क्रियाशिल कलाकार हुन् शिशिर भण्डारी । दर्जन बढी चलचित्र अनि म्युजिक भिडियोमा अभिनय गरिसकेका उनी पछिल्लो समय समाज सेवामा पनि उत्तिकै अग्रसर छन् ।

पछिल्लो समय कलाकारिता भन्दा समाज सेवामा व्यस्त बनेका उनले लकडाउनमा भने आफ्नो कलाकारिता मोहलाई पुनः सक्रिय बनाए। लकडाउनकै बीच सार्वजनिक भएको शिशिर अभिनित म्युजिक भिडियो “फोटो फिरिममा”ले त एक किसिमको तहल्कै पिट्यो। उनको चर्चा कलाकारिता क्षेत्रमा झन चुलियो।

यसैबीच, उनी अभिनित नयाँ म्युजिक भिडियो सार्वजनिक भएको छ। केही दिन अघि सार्वजनिक भएको “बाँधी राखन” बोलको म्युजिक भिडियोलाई छोटो समयमै एकदमै रुचाइएको छ। तिलक बस्नेत र कल्पमा पाण्डेको सुमधुर आवाज रहेको गीतमा प्रकाश न्यौपानेको शब्द र तिलक बस्नेतकै संगीत रहेको छ।

चोखो प्रेम सम्बन्धमा रहेको प्रेम जोडिको प्रेमिल भाव बोकेको गीतको भिडियो पनि आकर्षक तरिकाले निर्माण गरिएको छ। भिडियोमा शिशिरका अलवा पछिल्लो समयकी व्यस्त कलाकार रोश्नी कार्की फिचर्ड छिन् । हिन्दु र मुस्लिम धर्मका कारण प्रेम सम्बन्धमा आउने उतारचढावलाई भिडियो उत्कृष्ट तरिकाले देखाइएको छ।

शिशिर र रोश्नीको अभिनय भिडियोमा अब्बल एवम् उत्कृष्ट छ। वास्तवमै भन्नुपर्दा उनीहरूको केमिस्ट्री भिडियोमा गजब देखिएको छ। उनीहरुको जोडिलाई लिएर युटुबमा दर्शकले राम्रो प्रतिक्रिया समेत दिएका छन् । भिडियो हेर्दा शिशिर र रोश्नी स्टोरीमा डुबेर अभिनय गरेको महसुस हुने गर्छ।

भिडियोलाई सृजन बरालले निर्देशन गरेका हुन् । आकर्षक फ्रेममा भिडियोलाई राजेश घिमिरेले खिचेका छन् । भने, अमृत चापागाईंले भिडियो सम्पादन गरेका हुन् । भिडियो नयाँ नयाँ न्युज नेपालको अफिसियल युटुब च्यानलबाट सार्वजनिक गरिएको हो। हेर्नुस् भिडियो..