नेपालगन्ज : मेलोडियस गीत सृजना गर्न र गाउन अब्बल गायक हुन सुनिल गिरी। विगत एक दशकदेखि आफुले नै सृजना अनि गाउँदै आएका उनी पछिल्लो समयका एक लोकप्रिय गायकको रुपमा स्थापित भइसकेका छन् ।

पछिल्लो समय गीत संगीतमा लाग्ने नयाँ प्रतिभालाई पनि निशुल्क सहयोगको घोषणा गरेका सुनिलले पहिलो सहयोग एवम् अवसर मेलिना मैनालीलाई दिएका छन् ।

बाध्यताले लाहुर जाने मुग्लानीको कहानी रहेको “मुग्लान” बोलको गीतमा गायिका मेलिना मैनालीलाई अवसर दिएका हुन् । उक्त गीत बिहीबार रिलिज भइसकेको छ। गीतमा सुनिल गिरी र मेलिना मैनालीको सुमधुर आवाज रहेको छ। त्यस्तै, गीतमा मेलोडियस संगीत र मनछुने शब्द सुनिलको नै रहेको छ।

आर्थिक अनि रोजगारको अभावका कारण आफ्नो प्रेमिकालाई छोडेर धन कमाउन मुग्लान छिरेको मुग्लानीको कारुनिक कहानी सुनिलले गीतमा उतारेका छन् । गीतका प्रत्येक शब्द मर्मस्पर्शी छन् । गीतको मेलोडिले पनि त्यतिकै मन छुन्छ। मेलिना र सुनिलको गायिकी पनि गीतमा उत्कृष्ट छ।

गीतको अडियोसंगै भिडियो पनि आकर्षक बनेको छ। भिडियोमा सुनिल र मेलिना फिचर्ड छन् । भिडियोलाई विवेक बिकले छायांकन अनि सम्पादन गरेका हुन् भने निर्देशन सुनिलले नै गरेका छन् ।

मेलिना मैनालीको यस भन्दा अगाडिको गीत “छोटो छ जिन्दगी” एकदमै लोकप्रिय बनेको छ। मेलिनामा गायिकिको राम्रो क्षमता भएकोले निशुल्क सहयोग गरेको सुनिल बताउँछन। गीतको एरेन्ज अनि गीत सुनिलले आफ्नै होम स्टुडियोमा गरेका हुन् । केही हप्ता अगाडि आफुले होम स्टुडियो सन्चालन गरेको जानकारी दिँदै नयाँ प्रतिभालाई निशुल्क सहयोग गर्ने सुनिलले घोषणा गरेका थिए। त्यसै अनुरुप सुनिलले “मुग्लान” गीतमा मेलिनालाई अवसर दिएका हुन् ।

सुनिल गिरीको अफिसियल युटुब च्यानलबाट “मुग्लान” गीत रिलिज गरिएको हो। हेर्नुस् भिडियो..