काठमाडौं : उपेन्द्र सुब्बा निर्देशित फिल्म ‘मनसरा’को ट्रेलर रिलिज गरिएको छ। बुधबार काठमाडौंमा एक कार्यक्रमको आयोजना गर्दै निर्माण टिमले ४ मिनेट २७ सेकेन्डको ट्रेलर रिलिज गरेको हो।

ट्रेलरमा फिल्मका अभिनेता दयाहाङ राई अभिनेत्री मिरुना मगरको पछिपछि लागेका छन्। त्यही पनि पालाम सुनाउँदै। पालम मार्फत दयाले मिरुनाको सुन्दरतादेखि बोलि वचनसम्म तारिफ गरेका छन्।

उसो त ट्रेलरमा फिल्मका अर्का मुख्य अभिनेता प्रवीण खतिवडा पनि मिरुनाको प्रेममा चुर्लुम्म डुबेका छन्। आफ्नी श्रीमतीसँग बच्चा नभएपछि बिरक्तिएका प्रवीण मिरुनाको प्रेममा पागल झै भएका छन्। मिरुनाको छोरा भएपनि प्रवीण मिरुनालाई भित्र्याउने सोचमा देखिएका छन्। जुन कुरा प्रवीणकि श्रीमतीलाई पटक्कै मन पर्दैन। प्रवीणकि श्रीमतीको भुमिकामा अभिनेत्री मेनुका प्रधान छिन्। मिरुनाको कुरालाई लिएर मेनुका र प्रवीणको घरमा बारम्बार झगडा परिरहन्छ।

यता मिरुना भने घरको बुढीलाई माया र समय दिन सुझाव दिँदै प्रवीणलाई सम्झाउँछिन्। मिरुना लिम्बूनीको भुमिकामा छिन्। उसो त, दया चाहिँ मिरुनाको खोजिमा निस्किएको छनक पनि ट्रेलरले दिन्छ। हराएको भन्दै मिरुनाको तस्वीर टाँस्दै हिडेका छन् दया। जे होस् ट्रेलरले एक खालको कौतुहलरा जगाउँछ। ट्रेलर निकै उत्कृष्ट छ। दर्शकको ध्यान खिच्छ। गायक तथा संगीतकार सत्यराज आचार्य, कवि विप्लव प्रतिकलाई पनि ट्रेलरमा देख्न सकिन्छ।

पूरा फिल्म चाहिँ आगामी वैशाख २१ गतेदेखि प्रदर्शनमा आउँदैछ। मौलिक एवम् सामाजिक कथामा आधारित ‘मनसरा’ कबड्डी फिल्मसको ब्यानरमा निर्माण भएको हो। शैलेन्द्र कार्की यो फिल्मका निर्माता हुन्। फिल्मलाई शैलेन्द्रले नै खिचेका हुन्। निमेष श्रेष्ठले फिल्म सम्पादन गरेका हुन्।

सान्तिम कोइराला, संदेश अर्याल र दिपक खरेल फिल्मका सहायक निर्देशकहरु हुन्। फिल्ममा दयाहाङ राई, मिरुना मगर, प्रवीण खतिवडा, मेनुका प्रधान, शान्ति गिरी, हेमन्त बुढाथोकी लगायतका कलाकारहरुको अभिनय रहेको छ। फिल्मको पब्लिसिटी डिजाइनर आनन्द के महर्जन हुन्।

फिल्मले बक्स अफिसमा राम्रो व्यापार गर्ने आँकलन गरिएको छ। उपेन्द्रले यस् अघि निर्देशन गरेको फिल्म ‘जारी’ले निकै राम्रो व्यापार गरेको थियो। ‘मनसरा’ले पनि दर्शकको मन जित्दै राम्रो व्यापार गर्ने विश्वास निर्माण टिमको छ।