काठमाडौं : भोलि शुक्रबारदेखि नेपाल लगायत विश्वभर एकसाथ बहुप्रतिक्षित फिल्म ‘महाजात्रा’ प्रदर्शन हुँदैछ। देश तथा विदेशमा रहेका दर्शकहरु फिल्मको पर्खाइमा रहेका छन्। धेरैले त अग्रिम टिकट समेत खरिद गरिसकेका छन्।

मंगलबार काठमाडौंमा फिल्मको प्रिमियर शो समेत भयो। प्रिमियर पश्चात् फिल्मको चर्चा झन् बढेको छ। प्रिमियर शो हेरेपछि फिल्मलाई धेरै कलाकर्मी लगायत संचारकर्मीहरुले राम्रो प्रतिक्रिया समेत दिएका छन्।

अभिनेता विपिन कार्की पनि आफ्नो फिल्म हेर्न प्रिमियर शो’मा पुगेका थिए। फिल्म हेरेपछि उनले मिडियाकर्मीसँग कुराकानी समेत गरेका थिए।  उनले मिडियाको माझमा बोल्दै गर्दा फिल्मका मुख्य कलाकार हरिवंश आचार्यसमेत आइपुगेका थिए। पछि हरिवंश र विपिनले एकसाथ मिडियालाई अन्तर्वार्ता दिए। हरिवंशको अनुहारतिर हेर्दै विपिनले आफ्नो वर्षौंदेखिको सपना पूरा भएको बताएका थिए।

‘दाइ यहाँनेर उभिरहँदा मैले यति गर्व गरिरहेको छु’, विपिनले भने, ‘आज म चलचित्र क्षेत्रमा आउँदा खेरि जब मैले फिल्म नै खेल्न सुरु गरेको थिइनँ बीचमा दाइले मलाई अफर गर्नुभएको थियो। प्रदीप सर चाहिँ चिफ एडी हुनुहुन्थ्यो महसंचारमा। अहिले चाहिँ दाइसँग खेल्न पाएँ मेरो ड्रीम पूरा भयो। भोलिको सफलता के होला, कहाँ पुगिएला त्योभन्दा पनि मैले आजै त्यो सफलता एचिभ गरिसकेँ।’

उसो त विपीनले गुरु भन्दै हरिवंशलाई नमन गरेका थिए। हरिवंशले पनि अंकमाल गर्दै विपिनसँग फिल्म खेल्न सपन रहेको बताएका थिए। अभिनयमा विपिनको भर्सटायल रहेको भन्दै हरिवंशले तारिफ गरेका थिए।