ज्ञानु संगम खड्का : यतिबेला हलमा अन्य चलचित्रसंगै आफ्नो गति लिइरहेको एउटा चलचित्र छ। जुन चलचित्रले रिलिजका दिनदेखि नै यत्रतत्र प्रशंसा र चर्चा मात्रै पाएको छ। जम्मै चलचित्र समिक्षकबाट राम्रो समीक्षा पाएको छ। उक्त चलचित्र अरु कुनै नभएर ‘ऐना झ्यालको पुतली’ हो।

चलचित्र गत भदौ २४ गतेबाट देशभर प्रदर्शनमा आयो। उसो त प्रीमियरदेखि नै चलचित्रलाई एकदम राम्रो प्रतिक्रिया मिलिरहेको छ। माउथ पब्लिसिटीले त झन चलचित्रको प्रचार ह्वात्तै बढ्यो। अनि चर्चा पनि उतिनै चुलियो।

चर्चा पनि किन नचुलियोस, चलचित्र छ नै चर्चा चुलिने खालको। ‘अभावको परिवार। न त विजुली जोडिएको घर, न त सुखी सम्पन्न घर। जहाँ सधै अभाव खड्किरहन्छ। आर्थिक अभावका कारण छोराछोरीको पढाईलाई निरन्तरता दिन नसक्ने बाउआमा। त्यसैमा बाउ जडिया, जसले परिवारको वास्तै गर्दैनन् । यही पिरलो र छोराछोरीलाई राम्रो शिक्षा दीक्षा दिने संघर्षरत आमाको पिडा छुट्टै । उता घरमा भएका अनेकन अभावका बाबजुद पनि पढाइ अब्बल हुँदाहुँदै पैसाकै कारण पढ्न नसक्ने छोरीको पीडा। अनि आफ्नो घरमा टिभी नहुँदा अरुको घरमा पैसा तिरेर भएनी हेर्छु भन्ने सानो छोराको सपना। तर मात्र १५ रुपैयाँ नभएरै चलचित्र हेर्न नपाउनुको पिडा बेग्लै।”

सायद यस्तै विगत र अभाव हामी अधिकांशले भोगेर एक जिन्दगी पार गरेका हौं । विशेषगरी गाउँमा जन्मिएका हामीहरुको पीडा त माथि उल्लेखित जस्तै थियो। यस्ता विभिन्न अभावको आरोह अवरोह पार गर्दै आएका हामीहरु त्यो बालापन सम्झिँदा भक्कानिन्छौँ।

फेरि त्यही अनमोल बालापनमा फर्किँन पाए हुन्थ्यो भन्ने सोच्छौँ। हो, यही हाम्रो बालापनको अत्यास मेटाउँछ चलचित्र ‘ऐना झ्यालको पुतली’ले। माथि उल्लेखित अभावहरु र बालापनको भोगाइ एकपटक स्मरण गराउँछ चलचित्रले।

अझै बालापन र टीभी, उचित शिक्षा, स्वास्थ्य लगायतका विकाशका पुर्वाधार नहुँदाको कारुणिक जीवनको कालखण्ड स्मरण गर्न त पूरा चलचित्र हेर्नुपर्ने हुन्छ। जसका लागि हलसम्म पुग्नै पर्छ।

वास्तवमा सुजित बिडारीद्वारा निर्देशित ‘ऐना झ्यालको पुतली’ एउटा चलचित्र मात्रै होइन। जीवनको भागदौडमा व्यस्त भएका हामीहरुले भुलेको बालापन आँखाभरि झल्काउने मीठो कथा पनि हो ‘ऐना झ्यालको पुतली’।

एउटा अभावै अभावले गुज्रिएको परिवारको भाइको रहरको कथा, एउटा दिदिको सपनाको कथा अनि एउटी आमाको संघर्षको कथा पनि हो यो चलचित्र । समग्रमा भन्दा एउटा समाजको प्रतिबिम्ब हो चलचित्र भन्दा फरक नपर्ला ।

चलचित्रको कथाबस्तु, पात्र परिचालन र पात्रको अब्बल अभिनयले सुरुदेखि अन्तिमसम्म हेर्ने जोकोही दर्शकको आँखा रसाउँछ। यस् कुरामा चाहिँ निर्देशक एवम् लेखक सुजित बिडारी अब्बल साबित भएका छन् । उनले जसरी चलचित्रको कथा लेखेका थिए, त्यसरी नै पर्दामा उतारेका छन् ।

चलचित्रका कलाकार शिरु बिष्ट, अशोक शिवाकोटी, कन्चन चरिमाया, दिनेश खत्री, विशा चाम्लिङ राई, उमेश श्रेष्ठ ,मल्लिका श्रेष्ठ लगायतकाहरुको अभिनत त यति अब्बल छ कि, उनीहरूको अभिनयमा हेर्ने दर्शकले आफुलाई देख्नेगर्छन। जहाँ प्रयोग भएको भाषा, लवज, रितिरिवाज, भेषभुषा, खानपिन, रहनसहन लगायत मौलिक हुनुले त झन चलचित्र वास्तविक लाग्छ।

चलचित्रको सबै पक्ष अब्बल छ। जसले गर्दा चलचित्रको चर्चा बढिरहेको छ। जे होस् यस्ता चलचित्र बिरलै बन्छन् । जसले गर्दा नहेरेका दर्शकले यो चलचित्र नजिकका हलहरुमा गएर हेर्दा पैसा अशुल भएको आभाष हुन्छ। त्यसैले हेर्न छुटाउनै नहुने चलचित्र मध्ये ‘ऐना झ्यालको पुतली’ एक हो।