काठमाडौं : मानिसपिच्छे हरेकसंग कुनै न कुनै चिजको नसा अवश्य हुन्छ। मान्छेले चाहेर पनि त्यो नसा छोड्न सकेका हुँदैनन् । अझ भनौं लागिरहेको त्यो नसा वा लत चटक्कै छोड्न निकै गाह्रो हुन्छ।
यस्तै अनेकन नसा मध्ये गायक तथा सर्जक प्रेम सापकोटा सोनुलाई गीत संगीतको नसा छ। जुन प्रेमले चाहेर पनि जीवनभर छोड्न सक्दैनन् । प्रेमलाई गीत संगीतको यतिसम्म नसा छ कि उनी हरबखत संगीतकै साथमा रमाइरहेका हुन्छन् ।
बाग्लुङ जन्म घर भएका प्रेमले विगत लामो समयदेखि व्यस्त शहर जापानलाई आफ्नो कर्मथलो बनाएका छन् । मध्यम परिवारमा जन्मिएका प्रेमले गीत संगीतमै केही गर्न सकिन्छ कि भनेर जापान पुगे। उनले जापानमै बसेर सयौं गीत सृजना एवं गाइसकेका छन् । जसमध्ये अधिकांश उनका गीत लोकप्रिय छन् ।
गीत संगीतकै नसाको कुरा गर्नुपर्दा करिब ५ वर्षको अवधीमा प्रेमले जापानमा कर्म गरेर कमाएको करोड बढी लगानी गीत संगीतमा खर्च गरिसकेका छन् । गीत संगीतबाट आम्दानी भन्दा पनि दर्शक स्रोताको माया अनि आत्मसन्तुष्टि आफुले चाहने प्रेम बताउँछन् ।
पृथक गीत संगीतको सृजना अनि गायिकीबाट दर्शक स्रोता माझ प्रस्तुत हुन रुचाउने प्रेमले हालैमात्र एउटा नयाँ गीत बजारमा ल्याएका छन् ।
केही दिन अघि रिलिज भएको “जाँड पानी” बोलको गीतमा प्रेमको शब्द, संगीत अनि आवाज सुन्न सकिन्छ। प्रेमका अघिल्ला गीतहरु भन्दा यो नयाँ गीत नितान्त फरक छ गायिकी अनि सृजनाको हिसावले।
झट्ट गीतको शीर्षक ‘जाँड पानी’ हेर्दा दर्शक स्रोतामाझ नकारात्मक संदेश जान्छ कि भन्ने महशुस भएतापनि गीतले सकारात्मक संदेश दिएको छ।
युवाहरू पछिल्लो समय मध्यपानमा कसरी फसिरहेका छन् र कुलतमा फसेपछि कस्तोसम्म गतिविधि गर्छन् भन्ने कुरालाई प्रेमले गीतमा उतारेका छन् । आफुमा गीत संगीतको नसा भएपनि नयाँ गीतमा भने युवाहरुको मद्यपानको नसालाई प्रस्तुत गरेका छन् प्रेमले।
त्यसो त, गीतको भिडियोमा पनि युवाहरू कसरी
धूम्रपान र मध्यपानमा फस्छन भन्ने कुरालाई नै देखाइएको छ। लोकप्रिय कलाकार किरण केसी ‘रातामकै’, साया भन्डारी, अलिशा बास्तोला भिडियोमा फिचर्ड छन् । प्रेम स्वयं पनि भिडियोमा देखिएका छन् ।
भिडियोलाई काजिश श्रेष्ठले निर्देशन र छायांकन गरेका हुन् ।भने, बिनोद बमले सम्पादन गरेका छन् । भिडियोमा अगाडि जे जस्तो देखाइए पनि अन्तिममा भने सकारात्मक संदेश दिइएको छ।
“यो त गीत मात्रै हो छ भने यो बानी
हटाइ हालौं कुलत रक्सी चुरोट खानी
भोलि जिन्दगी कै हुनसक्छ हानी“
“नबसालौँ बानी
जाँड पानी चुरोट खानी
भन हे साथी, भट्टीमा नजानी”
गीत अन्तिम सम्म सुन्नेले यी शब्दहरु सुन्न पाउँछ। जुन शब्दहरुले सकारात्मक संदेश दिएको छ। त्यसैले यस् गीतका गायक एवम् सर्जक सापकोटाले गीतको शीर्षक हेरेर मुल्यांकन नगरेर पुरै गीत सुन्न आग्रह गरेका छन् ।
‘झट्ट शीर्षक हेर्दा गीतले नकारात्मक संदेश दिन्छ भन्ने भान सबैमा हुनसक्छ’, प्रेम भन्छन् , ‘तर गीत पुरै सुन्नु भयो भने अन्तिममा मैले जाँड रक्सी अनि चुरोट जस्ता कुलतजन्य चिजहरुको सेवन गर्नुहुँदैन बन्ने शब्दहरु राखेको छु। जुन शब्दले निकै सकारात्मक संदेश दिन्छ।’
सधै नयाँपन दिन खोज्ने प्रेमका “जाले रुमाल”, “मुटु बैना”, “बरमाला”, “डिपेन्डेन्ट भिसा” लगायत दर्जनौं गीतहरु दर्शक स्रोतामाझ निकै लोकप्रिय छन् ।
