काठमाडौं : प्रवासमा रहेर पनि लामो समयदेखि नेपाली गीत संगीत निरन्तरता दिइरहेका सर्जक तथा गायक हुन् प्रेम सापकोटा सोनु। हाल जापानमा रहेका उनी हरेक पल्ट फरक-फरक सृजना गर्न रुचाउँछन् ।

यसैबीच, केही दिन अघि मात्रै मौलिक रत्यौली गीत उनले बजारमा ल्याएका छन् । ‘बरमाला’ बोलको रत्यौली गीतमा प्रेमसंगै लोकप्रिय गायिका सम्झना भण्डारीको आवाज रहेको छ। आफ्नै गाउँ ठाउँमा विवाहको बेला गाइने रत्यौली शब्द अनि संगीतलाई संकलन गरेर प्रेमले ‘बरमाला’ तयार पारेका छन् ।

विशेषगरी मौलिकपन भन्दा बाहिर गएर गीतसंगीत सृजना गर्न नरुचाउने प्रेमले यो गीतबाट पनि मौलिकपन दर्शक स्रोता सामु पस्केका छन् । गीतलाई रिलिज भएको छोटो समयमै एकदम रुचाइएको छ। सामाजिक संजाल टिकटकदेखि युटुबसम्म गीतलाई लिएर राम्रो प्रतिक्रिया मिलेको छ।

टिकटककै कुरा गर्नुपर्दा प्रेमको यो गीतमा हजारौंले टिकटक भिडियो बनाएका छन् । बालक, जवानदेखि बृदसम्मका व्यक्तिहरुले यो गीतमा नाचेर टिकटक भिडियो बनाउँदा प्रेम यतिबेला खुसीले गदगद छन् ।

“नसोचेकै तरिकाले गीतलाई दर्शक स्रोताले रुचाइदिनुभयो”, उनी भन्छन् ”यो गीतलाई लिएर यतिधेरै दर्शक स्रोताको माया पाउँछु होला भनेर कल्पना समेय गरेको थिइनँ । टिकटक लगायत युटुबमा दर्शकले दिनुभएको उत्साहजनक प्रतिक्रियाले अझैँ यस्तै यस्तै मौलिक गीत सृजना गर्न अनि गाउन हौसला मिलेको छ। प्रिय दर्शक स्रोताप्रति आभारी छु।”

टिकटकमा गीत सुनेर युटुबमा हेर्न आएकै भन्दै सयौं कमेन्ट युटुबमा देख्द सकिन्छ। गीतलाई रिलिज भएको ५ दिनभित्र १ लाख बढी पटक हेरिएको छ। २५ सय बढी लाइक र ३ सय बढी सकारात्मक कमेन्ट युटुबमा देख्न सकिन्छ।

गीतको अडियोसंगै भिडियो पनि मौलिकपनमै आकर्षक तरिकाले निर्माण गरिएको छ। भिडियोलाई स्मृति तिमिल्सिना ‘गुरुआमा’ले निर्देशन गरेकी हुन् । सुरेश श्रेष्ठले आकर्षक फ्रेममा खिचेको भिडियोलाई प्रकाश धमलाले सम्पादन गरेका छन् । भिडियो प्रेम सापकोटा सोनुको अफिसियल युटुब च्यानलबाट रिलिज गरिएको हो। हेर्नुस् भिडियो..