नेपालगन्ज : लोक संस्कृति एवम् लोक नृत्यको संरक्षण अनि सम्बर्द्धनमा टेवा पुर्याउनको लागि खजुराका कलाकारहरु हरदम सक्रिय छन् ।

विभिन्न मेला महोत्सव लगायतका कार्यक्रममा लोक नृत्य प्रदर्शन गर्दै आफुलाई देशभर चिनाउन सफल छन् खजुरामा स्थापित सगरमाथा डान्स एन्ड इन्टरटेन्मेन्टका कलाकारहरु। यसैबीच, कोरोनाको यो महामारीका बीचमा पनि उच्च साबधानी अपनाउँदै खजुरामा ३ दिने लोक नृत्य कार्यशाला सम्पन्न भएको छ।

सगरमाथा डान्स एण्ड इन्टरटेन्मेन्टको आयोजना यही कार्तिक २० गतेदेखि संचालित लोक नृत्य कार्यशाला आज शनिबार सकिएको हो। नेपालगन्जको सिएस्टी होटलमा कार्यशालाका संयोजक दिलु सुनारको सभापतित्वमा समापन भएको कार्यक्रममा प्रमुख अतिथिको रुपमा खजुरा गाउपालिका उपाध्यक्ष एकमाया बिक रहेकी थिइन् ।

त्यस्तै समापन कार्यक्रममा विशिष्ट अतिथिको रुपमा रहेकी उक्त लोक नृत्य कार्यशालाका प्रशिक्षक रोचक थापा, कलाकार सुन्दर गुरुङ, लोक गायक तथा संचारकर्मी कमल निर्मोही, राकेश गुरुङ लगायत प्रशिक्षार्थीहरुको उपस्थिति रहेको थियो।

समापन कार्यक्रममा बोल्दै प्रमुख अतिथि समेत रहेकी खजुरा गाउँपालिका उपाध्यक्ष एकमाया बिकले भनिन् ,”म पदमा रहे पनि नरहेपनि लोक नृत्य अनि लोक संस्कृति संरक्षणमा सकेको सहयोग गर्नेछु। सगरमाथा डान्सका कलाकार भाइ बहिनीहरुको यो कार्य निकै सराहनीय छ। आगामी दिनहरुमा कला संस्कृतिलाई अगाडि बढाउन मेरो तर्फबाट हुने साथ सदैव रहिरहनेछ।”

त्यस्तै, लोक नृत्य कार्यशालामा १५ जना सहभागी थिए। ३ दिनको कार्याशालामा केही मात्रामा भएपनि लोक नृत्यको बारेमा सिकाएको प्रशिक्षक थापाले बताए।

पहिलेको तुलनामा कार्यशालापछि आफुहरुले लोक नृत्यको बारेमा अझै धेरै कुराहरु सिकेको र भविस्यमा सदैव संरक्षण तर्फ अग्रसर रहने प्रशिक्षार्थीहरुले बताए। समापन कार्यक्रममा प्रशिक्षक तथा प्रशिक्षार्थीहरुलाई सम्मान पत्र एवम् प्रमाणपत्र वितरण पनि गरिएको थियो।